30.09.2026 | 14:01
Մեծ Բրիտանիայի պաշտպանության նախարարը Բաքվում է
Զելենսկին հայտարարել է, որ Իրանի հարևան երկրներից ԱԹՍ-ների դեմ պայքարի հարցում օգնության 11 դիմում է ստացվել
Քաղաքականություն
09.03.2026 | 21:57
Ուկրաինան ավելի քան 10 դիմում է ստացել հարվածային անօդաչու թռչող սարքերի դեմ պայքարի հարցում օգնության համար։ Այս մասին հայտարարել է Ուկրաինայի նախագահ Վլադիմիր Զելենսկին, գրում է BBC-ի ռուսական ծառայությունը։
«Մենք վերլուծել ենք Իրանում պատերազմի հիմնական հեռանկարները և դրա երկարաձգման հնարավոր հետևանքները։ Մենք նաև մանրամասն ուսումնասիրել ենք պետությունների դիմումները մեր անվտանգության աջակցության համար՝ «Շահեդ»-ների և այլ նմանատիպ մարտահրավերների դեմ պայքարում»,- ասել է Ուկրաինայի նախագահը։
Նրա խոսքով՝ ներկայում կա «Իրանի հարևաններից, եվրոպական երկրներից և Ամերիկայից 11 դիմում»՝ «հետաքրքրություն Ուկրաինայի կենսապաշտպանության փորձի, համապատասխան խափանող սարքերի, ռադիոէլեկտրոնային պատերազմի համակարգերի և վերապատրաստման նկատմամբ»։
«Մենք որոշ խնդրանքներին արձագանքել ենք կոնկրետ լուծումներով և աջակցությամբ»,- հավելել է նա՝ առանց երկրների անունները նշելու կամ օգնության մասին լրացուցիչ մանրամասներ տրամադրելու։
Իրանի դեմ ԱՄՆ-ի և Իսրայելի պատերազմի սկսվելուց և Պարսից ծոցին Իրանի կողմից պատասխան հարվածներից հետո Ուկրաինան առաջարկել է անօդաչու թռչող սարքերի դեմ օգնություն՝ հղում անելով ռուսական կամիկաձե անօդաչու թռչող սարքերի հարձակումները հետ մղելու իր փորձին։
New York Times-ին տված հարցազրույցում Զելենսկին հայտարարել է, որ Կիևը Հորդանանում ամերիկյան ռազմական բազաները պաշտպանելու համար ուղարկել է անօդաչու թռչող սարքեր և անօդաչուների մասնագետների թիմ։ ԱՄՆ իշխանությունները որևէ մեկնաբանություն չեն արել այս մասին։
Թարգմանությունը՝ Էմմա Չոբանյանի
