ԱՄՆ-ը տարհանում է Թուրքիայի հարավում գտնվող իր հյուպատոսության աշխատակիցներին

Միացյալ Նահանգները երկուշաբթի դադարեցրել է Թուրքիայի հարավում գտնվող իր հյուպատոսության ծառայությունները և հրահանգել է ոչ էական աշխատակիցներին լքել այն։ X-ում հրապարակված հայտարարության մեջ ԱՄՆ Պետքարտուղարությունը նշել է, որ որոշումը կայացվել է անվտանգության հետ կապված ռիսկերի պատճառով։

«2026 թվականի մարտի 9-ին Պետքարտուղարությունը հրամայել է ԱՄՆ կառավարության ոչ արտակարգ աշխատակիցներին և աշխատակիցների ընտանիքների անդամներին՝ լքել Ադանայի գլխավոր հյուպատոսությունը՝ անվտանգության հետ կապված ռիսկերի պատճառով»,- ասվում է հայտարարության մեջ։

Կոչ է արվում նաև տարածաշրջանում գտնվող ՄՄՆ քաղաքացիներին՝ լքել այն։

Մինչ այս, Վաշինգտոնը թարմացրել է իր ճանապարհորդական նախազգուշացումը՝ Իրանի, ԱՄՆ-ի և Իսրայելի միջև վերջերս տեղի ունեցած լարվածության սրումից հետո։

Ավելի վաղ Թուրքիայի  պաշտպանության նախարարությունը հայտարարել էր, որ Իրանից Թուրքիայի օդային տարածքի ուղղությամբ արձակված բալիստիկ զինամթերքը որսացվել և չեզոքացվել է Արևելյան Միջերկրական ծովում գտնվող ՆԱՏՕ-ի օդային և հրթիռային պաշտպանության համակարգերի կողմից։

Տարածաշրջանային լարվածությունը սրվել է այն բանից հետո, երբ Միացյալ Նահանգներն ու Իսրայելը փետրվարի 28-ին համատեղ հարձակում սկսեցին Իրանի վրա։ Իրանական իշխանությունների տվյալներով՝ հարվածների հետևանքով զոհվել է ավելի քան 1200 մարդ, այդ թվում՝ երկրի գերագույն առաջնորդ այաթոլլահ Ալի Խամենեին, վիրավորվել է ավելի քան 10,000 մարդ։

Իրանը հակադարձել է հրթիռային և անօդաչու թռչող սարքերով հարձակումներով՝ ուղղված Իսրայելին, Իրաքին, Հորդանանին և մի քանի Պարսից ծոցի երկրներին, որտեղ տեղակայված են ԱՄՆ ռազմական ակտիվները։

Թարգմանությունը՝ Էմմա Չոբանյանի