Զելենսկին հայտարարել է Հորդանանում ԱՄՆ բազան պաշտպանելու համար ուկրաինական ԱԹՍ-ներ և փորձագետների ուղարկելու մասին

Ուկրաինան անօդաչու թռչող սարք-որսիչներ և ԱԹՍ-ների մասնագետների թիմ է ուղարկել՝ Հորդանանում ամերիկյան ռազմա բազաները պաշտպանելու համար։ Այս մասին հայտարարել է երկրի նախագահ Վլադիմիր Զելենսկին New York Times-ին տված հարցազրույցում։ Ըստ Զելենսկիի՝ Միացյալ Նահանգներն օգնություն է խնդրել հինգշաբթի, և ուկրաինական թիմը մեկնել է հաջորդ օրը, գրում է BBC-ի ռուսական ծառայությունը։

«Մենք անմիջապես արձագանքեցինք։ Ես ասացի՝ «Այո, իհարկե, մենք կուղարկենք մեր փորձագետներին»»,- ասել է նա։

Սպիտակ տունը չի պատասխանել ԱՄՆ-ի կողմից Ուկրաինայից օգնություն խնդրելու մասին հարցին։

NYT-ը մեկնաբանում է, որ ամերիկա-իսրայելական պատերազմն Իրանի դեմ կարող է շեղել աշխարհի ուշադրությունն Ուկրաինայում պատերազմից: Միևնույն ժամանակ, այն Կիևին հնարավորություն է տվել օգտագործել իր ձեռք բերած փորձը և առաջադեմ տեխնոլոգիաները նոր ճակատում։ Ուկրաինան առաջարկել է օգնել ամերիկյան զորքերին և նրանց մերձավորարևելյան դաշնակիցներին՝ պաշտպանվել իրանական հարձակողական անօդաչու թռչող սարքերից, որոնք Ռուսաստանը տարիներ շարունակ օգտագործում է Ուկրաինայում։

«Կիևը հույս ունի միավորներ վաստակել ԱՄՆ-ի միջնորդությամբ ընթացող խաղաղ բանակցություններում։ Հարաբերությունները մնում են լարված։ Հինգշաբթի նախագահ Թրամփը կրկին հայտարարեց, որ Զելենսկիին համարում է խաղաղության համաձայնագրի ավելի մեծ խոչընդոտ, քան Ռուսաստանի նախագահ Վլադիմիր Պուտինին»,- գրել է NYT-ը։

ԱՄՆ պաշտոնյաները նախկինում պնդում էին, որ Ռուսաստանը պատերազմի ժամանակ Իրանին տրամադրել է հետախուզական տվյալներ, այդ թվում՝ արբանյակային լուսանկարներ, որոնք ցույց են տալիս ամերիկյան ռազմանավերի և զորքերի գտնվելու վայրերը։ Զելենսկին պնդել է, որ ինքը նաև տեսել է հետախուզական տվյալներ, որոնք ցույց են տալիս, որ Իրանի վրա հարձակվելու համար ներկայում օգտագործվող անօդաչու թռչող սարքերն ունեն ռուսական բաղադրիչներ։

Ուկրաինայի նախագահն ասել է, որ ցանկանում է օգնել Մերձավոր Արևելքի երկրներին, բայց պետք է նաև հավասարակշռի այդ խնդրանքներն Ուկրաինայի ներքին կարիքների հետ։

Իրանում պատերազմը կարող է դադարեցնել պաշտպանական զենքի հոսքը, որն Ուկրաինային հուսահատորեն անհրաժեշտ է։ Կիևն առաջարկել է իր անօդաչու թռչող սարքերը փոխանակել ավելի հզոր համակարգերի հետ, որոնք անհրաժեշտ են ռուսական բալիստիկ հրթիռներին հակազդելու համար։

Թարգմանությունը՝ Էմմա Չոբանյանի