27.10.2026 | 00:08
Վարդան Մինասյանն աշխատանքի է անցել Լիբանանում
Human Rights Watch-ն Իսրայելին մեղադրում է Լիբանանում սպիտակ ֆոսֆոր օգտագործելու մեջ
Քաղաքականություն
09.03.2026 | 13:51
Human Rights Watch (HRW) միջազգային իրավապաշտպան կազմակերպությունը զեկույց է հրապարակել՝ հայտարարելով, որ իսրայելական ուժերը հարավային Լիբանանի մի գյուղի «անօրինականորեն» հարվածել են սպիտակ ֆոսֆոր պարունակող արկերով, որը վիճահարույց հրկիզող զինամթերք է, գրում է France 24-ը։
Յոթ պատկերների աշխարհագրական դիրքը որոշելու և ստուգելու միջոցով HRW-ը հայտնել է, որ Իսրայելը սպիտակ ֆոսֆոր է կիրառել հրետանու միջոցով հարավային Լիբանանի Յոհմոր գյուղի բնակելի թաղամասերին հարվածելիս։ Դա տեղի է ունեցել մի քանի ժամ անց այն բանից հետո, երբ իսրայելցի զինվորականները գյուղի և հարավային Լիբանանի տասնյակ այլ բնակավայրերի բնակիչների հրահանգել են տարհանվել։
HRW-ը հայտարարել է, որ չի կարող անկախ կերպով պարզել՝ արդյո՞ք տարածքում դեռևս կան բնակիչներ կամ արդյո՞ք որևէ մեկը տուժել է։
Մարդու իրավունքների պաշտպանները նշում են, որ սպիտակ ֆոսֆորի օգտագործումը, միջազգային իրավունքի համաձայն, անօրինական է, երբ սպիտակ-տաք քիմիական նյութը նետվում է բնակեցված տարածքներ։ Այն կարող է հրդեհել շենքերը և այրել մարդկային մարմինը մինչև ոսկորներ։ Ողջ մնացածները վարակների և օրգանների կամ շնչառական անբավարարության վտանգի տակ են, եթե նույնիսկ այրվածքները փոքր են։
«Իսրայելական զինվորականների կողմից սպիտակ ֆոսֆորի անօրինական օգտագործումը բնակելի տարածքներում չափազանց մտահոգիչ է և ծանր հետևանքներ կունենա քաղաքացիական բնակչության համար»,- ասել է HRW-ի Լիբանանի հարցերով հետազոտող Ռամզի Կաիսը։
Իսրայելական զինվորականներն անմիջապես չեն արձագանքել մեկնաբանության խնդրանքին։
Իսրայելը, որը շարունակում է հարվածներ հասցնել լիբանանյան «Հըզբոլլահ»-ին, ցամաքային զորքեր է ուղարկել սահմանային շրջաններ։ Լիբանանի իշխանությունները հայտարարել են, որ Իսրայելի հարձակումների հետևանքով զոհվել է առնվազն 394 մարդ, որոնց արդյունքում ավելի քան կես միլիոն մարդ տեղահանվել է։
Լիբանանի պետական ազգային լրատվական գործակալությունը հայտնել է, որ իսրայելական ուժերը «հրետանային և ֆոսֆորային կրակոցներով» թիրախավորել են Իսրայելի հետ սահմանի մոտ գտնվող Խիամ և Թալ Նահաս քաղաքները։
Ավելի վաղ ՄԱԿ-ը զգուշացրել էր, որ Լիբանանի բնակչությանն ուղղված Իսրայելի զանգվածային տարհանման հրամանները միջազգային իրավունքի խախտում կարող են լինել։
Թարգմանությունը՝ Էմմա Չոբանյանի
