09.03.2026 | 10:17
Դիլիջան-Իջևան ճանապարհի բախվել են «Toyota» և «VAZ» մակնիշների ավտոմեքենաներ․ կա տուժած
The Jerusalem Post․ ԱՄԷ-ն հերքում է Իրանին հարվածելու մասին տեղեկությունը
Քաղաքականություն
08.03.2026 | 17:49
Արաբական Միացյալ Էմիրությունները հերքում են, որ առաջին անգամ հարված են հասցրել Իրանի տարածքին, կիրակի՝ մարտի 8-ին հայտնում է The Jerusalem Post-ը՝ հղում անելով ԱՄԷ բարձրաստիճան պաշտոնյային։
Ավելի վաղ իսրայելական առցանց Ynet պարբերականը հայտնել էր, որ հարվածը հասցվել է ջրի աղազերծման կայաններին։
«Իսրայելում կարծում են, որ այս հարվածը պարզապես ազդանշան էր (իրանական – խմբ.) ռեժիմին, և եթե Իրանի հարձակումները ուժեղանան, կա իրական հավանականություն, որ ԱՄԷ-ն կմիանա (Իսրայելի և ԱՄՆ-ի՝ Իրանի դեմ ռազմական գործողությանը-խմբ.), թեկուզ սահմանափակ մասշտաբներով»,- նշվում էր Ynet-ի հրապարակման մեջ։
Իր հերթին The Jerusalem Post-ը գրում էր, որ ԱՄԷ-ի հնարավոր հարձակումը կարող էր լինել Իրանի կողմից արձակված հրթիռների և անօդաչուների արձակման պատասխան։ Ինչպես փոխանցում է AP գործակալությունը՝ հղում անելով ԱՄԷ պաշտպանության նախարարությանը, մարտի 8-ին երկրի հակաօդային պաշտպանության համակարգերը Իրանի տարածքից արձակված 17 հրթիռներից 16-ը որսացել են։ Վերջին հրթիռը, ըստ այդ տվյալների, ընկել է ծովը։ Բացի այդ, որսացվել են Իրանից արձակված գրեթե բոլոր անօդաչու թռչող սարքերը։ Սակայն չորս ԱԹՍ ընկել են ԱՄԷ տարածքում։ Իրավիճակին արձագանքելով՝ ԱՄԷ պաշտպանության նախարարությունը հայտարարել է, որ «պատրաստ է կոշտ պատասխան տալ» սպառնալիքներին։
Նույն օրը՝ մարտի 8-ին ավելի ուշ հրապարակման մեջ The Jerusalem Post-ը ներկայացրել է ԱՄԷ անանուն բարձրաստիճան պաշտոնյայի հայտարարությունը, ով հերքել է իր երկրի մասնակցությունը Իրանում գտնվող աղազերծման կայանի վրա հարձակմանը։ Նրա խոսքով՝ եթե ԱՄԷ-ն ցանկանար մտնել պատերազմի մեջ, ապա կհարվածեր ոչ թե քաղաքացիական, այլ ռազմական օբյեկտի Իրանում․ այսպես են լրագրողները մեկնաբանել իրենց զրուցակցի խոսքը։
Միևնույն ժամանակ Reuters գործակալությունը մեջբերում է Իսրայելի պաշտպանության բանակի (ՑԱՀԱԼ) խոսնակի հայտարարությունը, ըստ որի Իսրայելը նույնպես հարվածներ չի հասցրել Իրանում գտնվող աղազերծման կայաններին և չի թիրախավորել դրանք։
Իրանի արտաքին գործերի նախարար Աբբաս Արաղչին մարտի 8-ին հայտարարել է, որ Իրանի Քեշմ կղզում գտնվող աղազերծման գործարանի վրա ավիահարվածը հասցրել է ԱՄՆ-ը։ Դիվանագետը զգուշացրել է, որ այդ կերպ «նախադեպը ստեղծել է ԱՄՆ-ը, ոչ թե Իրանը» տարածաշրջանում, որտեղ խմելու ջրի պաշարները սահմանափակ են։
Փետրվարի 28-ին ԱՄՆ-ը և Իսրայելը սկսեցին հարվածներ հասցնել Իրանի տարածքին։ Իսլամական Հանրապետությունը պատասխանեց Իսրայելի և Մերձավոր Արևելքի այն երկրների դեմ հրթիռների ու անօդաչուների հարձակումներով, որոնք տարածաշրջանում Վաշինգտոնի դաշնակիցներն են։ Մասնավորապես հարձակումները ազդել են Պարսից ծոցի մի շարք երկրների վրա՝ ԱՄԷ, Օման, Քաթար, Բահրեյն և Քուվեյթ։ Թեհրանը հայտարարում է, որ իր հարվածների թիրախը այդ երկրներում գտնվող ամերիկյան ռազմական բազաներն են։
ԱՄՆ-ի և Իսրայելի ռազմական գործողության արդյունքում սպանվել են Իրանի գերագույն առաջնորդ այաթոլլա Ալի Խամենեին և Իսլամական Հանրապետության մի շարք բարձրաստիճան պաշտոնյաներ։
Մարտի 7-ին Իրանի նախագահ Մասուդ Փեզեշքիանը, ելույթ ունենալով պետական հեռուստատեսությամբ, ներողություն է խնդրել հարևան երկրներից, որոնք տուժել են Իրանի հարձակումներից։ Սակայն մարտի 8-ին նա հայտարարել է, որ Իսլամական Հանրապետությունը «ստիպված կլինի պատասխանել» հարևան երկրների տարածքից իրականացվող ցանկացած հարձակման։
