Իրանը հայտարարել է, որ թիրախավորել է ԱՄԷ-ում, Կատարում, Հորդանանում ամերիկյան ռադարները, Քուվեյթում՝ ԱՄՆ բազաները

Կատարը հայտարարել է, որ իր ռազմածովային ուժերը գիշերը գտնվել են Բահրեյնում Իրանի կողմից թիրախավորված շենքերի ներսում, սակայն չեն տուժել, գրում է France 24-ը։

«Կատարը խստորեն դատապարտում է Բահրեյնի Թագավորության տարբեր մասերում գտնվող շենքերի վրա Իրանի հարձակումը, որտեղ բնակվում են Կատարի էմիրի ռազմածովային ուժերի անդամները, որոնք մասնակցում են Պարսից ծոցի համագործակցության խորհրդի միասնական ռազմական հրամանատարության ծովային գործողությունների կենտրոնին»,- ասվում է արտաքին գործերի նախարարության հայտարարության մեջ։

Նշվում է, որ թիրախավորված շենքերում գտնվող Կատարի ռազմածովային ուժերի անձնակազմն անվտանգ է և անվնաս։

Ավելի վաղ Բահրեյնը հայտարարել էր, որ Իրանը հարվածել է մայրաքաղաք Մանամայում գտնվող մի հյուրանոցի և երկու բնակելի շենքերի՝ պարզաբանելով նախկինում տարածված հաղորդագրությունն այն մասին, որ հարվածներ են հասցվել երկու հյուրանոցի և մեկ բնակելի շենքի։

Իրանի բանակն էլ հայտարարում է, որ հարձակվել է Քուվեյթում գտնվող ամերիկյան բազաների վրա և խոստացել շարունակել հետագա հարվածները։

«Վերջին մի քանի ժամվա ընթացքում բանակի ցամաքային ուժերի տարբեր տեսակի ավերիչ անօդաչու թռչող սարքերը մեծ թվով թիրախավորել են Քուվեյթում գտնվող ամերիկյան ռազմական բազաները»,- հայտարարել է Իսլամական Հանրապետության բանակը՝ ըստ երկրի պետական ​​հեռուստատեսության։

Նշում է, որ այս հարձակումները կշարունակվեն առաջիկա ժամերին։

Իսլամական հեղափոխության պահապանների կորպուսը (ԻՀՊԿ) հայտարարել է, որ իրենց ուժերը թիրախավորել են Արաբական Միացյալ Էմիրություններում, Հորդանանում և Կատարում տեղակայված ռադարային համակարգերը։

«ԱՄՆ-ի THAAD ռադարները, որոնք տեղակայված են Արաբական Միացյալ Էմիրություններում և Հորդանանում, ինչպես նաև Կատարում տեղակայված ամերիկյան FPS-132 հորիզոնի վրայով ռադիոտեղորոշիչը («Անապատի աչք»), ոչնչացվել են Իսլամական հեղափոխության պահապանների կորպուսի (ԻՀՊԿ) հրթիռային և անօդաչու թռչող սարքերի ստորաբաժանումների կողմից»,- հայտնել է Կորպուսը իր Sepah News կայքում։

Թարգմանությունը՝ Էմմա Չոբանյանի