27.07.2026 | 23:18
Ոստիկանները ձերբակալել են ապօրինի զենք պահող տղամարդուն
Թրամփը ցանկանում է մասնակցել Իրանի նոր առաջնորդի ընտրությանը․ Խամենեիի որդուն չի համարում ընդունելի թեկնածու. Axios
Քաղաքականություն
05.03.2026 | 22:55
ԱՄՆ նախագահ Դոնալդ Թրամփը մարտի 5-ին Axios-ին տված հարցազրույցում հայտարարել է, որ ցանկանում է անձամբ մասնակցել Իրանի նոր Գերագույն առաջնորդի ընտրության գործընթացին։
«Նրանք [Իրանի իշխանությունները] զուր ժամանակ են վատնում։ Խամենեիի որդին «թեթև քաշային» է։ Ես պետք է մասնակցեմ նշանակմանը, ինչպես Դելսիի [Ռոդրիգես] դեպքում Վենեսուելայում»,- ասել է Թրամփը։
ԱՄՆ նախագահն ընդգծել է, որ չի ընդունի Իրանի այնպիսի նոր առաջնորդի, որը կշարունակի սպանված Ալի Խամենեիի քաղաքականությունը։ Ըստ Թրամփի՝ նման սցենարը կստիպի Միացյալ Նահանգներին «հինգ տարի անց» կրկին վերադառնալ պատերազմին։
«Խամենեիի որդին ինձ համար անընդունելի է։ Մեզ պետք է մեկը, ով ներդաշնակություն և խաղաղություն կբերի Իրան»,- հավելել է նա։
Հիշեցնենք, որ Ալի Խամենեիի որդին՝ 56-ամյա Մոջթաբա Խամենեին, համարվում է Իրանի Գերագույն առաջնորդի պաշտոնի հիմնական հավակնորդը, թեև պաշտոնապես Իրանի իշխանությունները դեռ չեն հայտարարել նրա նշանակման մասին։ Մոջթաբա Խամենեին հոգևորական է և երբեք պետական պաշտոններ չի զբաղեցրել։ Axios-ի փոխանցմամբ՝ նա սերտ կապեր ունի Իսլամական հեղափոխության պահապանների կորպուսի (ԻՀՊԿ) հետ։
Ավելի վաղ՝ մարտի 3-ին, պատասխանելով այն հարցին, թե ով կարող է փոխարինել Ալի Խամենեիին, Դոնալդ Թրամփը հայտարարել էր, որ այն մարդկանց մեծ մասը, որոնց թեկնածությունը դիտարկում էր ԱՄՆ-ը, զոհվել են Իրանի դեմ ԱՄՆ-ի և Իսրայելի պատերազմի մեկնարկից հետո։
