Քաղաքականություն
05.03.2026 | 14:50
Նախիջևանի օդանավակայանի վրա իրանական անօդաչու թռչող սարքի հարձակումից հետո ուսուցիչներն ու աշակերտները տարհանվել են մոտակա դպրոցներից, հայտնել է Նախիջևանի կրթության նախարարությունը տեղի լրատվամիջոցներին։ Նշվում է, որ տարածքում գտնվող երկու դպրոց է տարհանվել՝ աշակերտների անվտանգությունն ապահովելու համար։
Հաղորդվում է, որ դպրոցներին որևէ վնաս չի հասցվել, դասապրոցեսը շարունակվում է։
Նախիջևանի առողջապահության նախարարությունից էլ haqqin.az-ին հայտնել են, որ միջադեպի վերաբերյալ ստացվել է միայն մեկ բողոք՝ բարձր աղմուկի պատճառով լսողության խնդիրներ ունեցող անձի մասին։
Ըստ APA-ի՝ անօդաչու թռչող սարքերից մեկը բախվել է օդանավակայանի տերմինալին, իսկ մի քանիսն ընկել են այլ վայրերում։ Անօդաչուի բեկորներն ընկել են օդանավակայանի թռիչքուղու վրա, մի քանի տեղերում վնասել ասֆալտը։
Նշվում է, որ Նախիջևանի օդանավակայանում վիրավորված երկու քաղաքացիական անձինք տեղափոխվել են տեղի հանրապետական հիվանդանոցի շտապօգնության բաժանմունք, նրանց վիճակը կայուն է։
Թարգմանությունը՝ Էմմա Չոբանյանի
