Ուկրաինան Մերձավոր Արևելք կուղարկի մասնագետներ՝ իրանական անօդաչու թռչող սարքերի դեմ պայքարում աջակցելու համար

Ուկրաինան պատրաստվում է իր զինծառայողներին և ռազմական փորձագետներին ուղարկել Մերձավոր Արևելքի երկրներ՝ աջակցելու նրանց իրանական անօդաչու թռչող սարքերի հարձակումներին դիմակայելու գործում։ Այս մասին հայտարարել է Ուկրաինայի նախագահ Վլադիմիր Զելենսկին։

Մերձավոր Արևելքում ստեղծված իրավիճակի վերաբերյալ խորհրդակցությունից հետո Զելենսկին նշել է, որ քննարկումներ է ունեցել եվրոպացի գործընկերների և ԱՄՆ-ի հետ, ինչպես նաև բանակցություններ է վարել ԱՄԷ-ի, Կատարի, Հորդանանի և Բահրեյնի ղեկավարների հետ։

Նրա խոսքով՝ նշված երկրները կանգնած են լուրջ մարտահրավերի առաջ․ իրանական հարվածային անօդաչուները՝ նույն «Շահեդ» տիպի սարքերը, որոնք արդեն չորս տարի օգտագործվում են Ուկրաինայի քաղաքների և ենթակառուցվածքների դեմ, այժմ կիրառվում են նաև տարածաշրջանում։ Զելենսկին ընդգծել է, որ Ուկրաինան կարող է աջակցել իրավիճակի կայունացմանը, և գործընկեր երկրները դիմել են համապատասխան խնդրանքով։

Ուկրաինայի նախագահը հանձնարարել է կառավարությանը, ռազմական հրամանատարությանը և հետախուզական կառույցներին ներկայացնել աջակցման տարբերակներ՝ այն հաշվարկով, որ այդ օգնությունը չթուլացնի Ուկրաինայի սեփական պաշտպանունակությունը։ Նրա խոսքով՝ ուկրաինացի մասնագետները կաշխատեն տեղում, և համապատասխան թիմերի ձևավորման շուրջ արդեն պայմանավորվածություններ են ձեռք բերվում։

Միաժամանակ Զելենսկին չի հստակեցրել, թե երբ կուղարկվեն ուկրաինացի մասնագետներ Մերձավոր Արևելք և քանի մարդ կներառվի առաքելության կազմում։

Հիշեցնենք, որ փետրվարի 28-ից Իսրայելն ու ԱՄՆ-ը հարվածներ են հասցնում Իրանի տարածքին, իսկ Թեհրանը պատասխանում է հակահարվածներով, այդ թվում՝ «Շահեդ» տեսակի անօդաչու թռչող սարքերի կիրառում Իսրայելի և Մերձավոր Արևելքի այլ երկրների ուղղությամբ։