Պենտագոնի ղեկավարը հայտարարել է, որ «Ամերիկան ​​հաղթում է Իրանում»

Ամերիկան Իրանում ​​հաղթում է վճռականորեն, ջախջախիչ և անողորմ։ Այս մասին Պենտագոնում ճեպազրույցի ժամանակ հայտարարել է ԱՄՆ պաշտպանության նախարար Փիթ Հեգսեթը, գրում է BBC-ն։

Ըստ նրա՝ Իրանի դեմ ԱՄՆ-ի արշավը «յոթ անգամ ավելի ինտենսիվ է, քան Իսրայելի [12-օրյա ռազմական արշավը] Իրանի դեմ»։

«Ընդամենը չորս օր է անցել, բայց ինչպես նախագահ Թրամփն ասաց՝ ԱՄՆ-ը կպահանջի այնքան ժամանակ, որքան անհրաժեշտ է գործողության հաջողության համար»,- ասել է Պենտագոնի ղեկավարը։

Ըստ Հեգսեթի՝ վերջին չորս օրերի արդյունքներն «անհավանական, իսկապես պատմական» են եղել․ «Նրանց վերջը եկել է, և նրանք դա գիտեն»։

Ամերիկացի պաշտոնյան նաև հայտարարել է, թե «Իրանի առաջնորդները կնայեն վերև և կտեսնեն միայն ԱՄՆ-ի և Իսրայելի օդուժը», մինչև ԱՄՆ-ը և Իսրայելը որոշեն, որ պատերազմն ավարտվել է։

«Սա երբեք նախատեսված չէր լինել արդար մարտ, և դա արդար մարտ չէ։ ԱՄՆ- հարվածում է Իրանին, «երբ այն արդեն դժվարին վիճակում է։ Ալիքները մեծանում են, և մենք նոր ենք սկսում։ Իրանը փորձել է սպանել նախագահ Թրամփին»,- պնդել է Պենտագոնի ղեկավարը՝ հավելելով․ «ԱՄՆ նախագահ Թրամփը վերջինն է ծիծաղում»։

BBC-ի հարցին՝ արդյո՞ք կարող է լրացուցիչ տեղեկություններ տրամադրել Մինաբում աղջիկների դպրոցի ռմբակոծության վերաբերյալ, որի հետևանքով, ըստ Իրանի, զոհվել է առնվազն 153 մարդ, այդ թվում՝ շատ երեխաներ, Հեգսեթը պատասխանել է․ «Ես միայն կարող եմ ասել, որ մենք դա հետաքննում ենք։ Մենք, իհարկե, երբեք չենք թիրախավորում քաղաքացիական անձանց, բայց մենք ուսումնասիրում և հետաքննում ենք դա»։

Թարգմանությունը՝ Էմմա Չոբանյանի