24.04.2026 | 23:32
Կապանում ջրանջատում կլինի
Թուրքիան իր տարածք ուղղվող իրանական բալիստիկ հրթիռ է որսացել
Քաղաքականություն
04.03.2026 | 16:45
Թուրքիայի ազգային պաշտպանության նախարարությունը հայտարարել է, որ Արևելյան Միջերկրական ծովում գտնվող ՆԱՏՕ-ի օդային և հրթիռային պաշտպանության միջոցները որսացել են իրանական բալիստիկ հրթիռ, որը հայտնաբերվել է Իրանի տարածքով դեպի Թուրքիայի օդային տարածք ուղղություն վերցնելիս՝ արձակվելուց և Իրաքի ու Սիրիայի օդային տարածքները հատելուց հետո։
«Իրանից արձակված բալիստիկ զինամթերքը, որը հայտնաբերվել է Իրաքի և Սիրիայի օդային տարածքները հատելուց հետո դեպի Թուրքիայի օդային տարածք շարժվելիս, ժամանակին խոցվել և չեզոքացվել է Արևելյան Միջերկրական ծովում տեղակայված ՆԱՏՕ-ի օդային և հրթիռային պաշտպանության տարրերի կողմից»,- ասվում է նախարարության հայտարարության մեջ։
Հակաօդային պաշտպանության զինամթերքի բեկորներն ընկել են Հաթայ նահանգի Դորթյոլ շրջանում։ Զոհերի կամ վիրավորների մասին տեղեկություններ չկան։
Shafaq News-ի և North Press Agency-ի հաղորդագրությունները ցույց են տալիս, որ իրանական բալիստիկ հրթիռը որսացել են Սիրիայի հյուսիս-արևելքում գտնվող Ղամիշլիի վրայով՝ Թուրքիայի սահմանի մոտ։ Թուրքիայի Ինջիրլիքի ավիաբազան վերահսկվում և կառավարվում է թուրքական զինվորականների կողմից, չնայած այնտեղ տեղակայված են ամերիկյան զորքեր։ Լրատվամիջոցների հաղորդագրությունների համաձայն՝ Ինջիրլիքում ԱՄՆ-ն ունի ավելի քան 1000 զինծառայող։
Թուրքական կողմի հայտարարության մեծ նշվում է, որ Անկարայի վճռականությունն ու կարողությունը՝ ապահովելու իր երկրի և քաղաքացիների անվտանգությունը, ամենաբարձր մակարդակի վրա են։
«Թուրքիան կողմ է տարածաշրջանային կայունությանն ու խաղաղությանը և ունակ է ապահովել իր տարածքի և քաղաքացիների անվտանգությունը՝ անկախ նրանից, թե որտեղից է գալիս սպառնալիքը։ Մեր տարածքի և օդային տարածքի պաշտպանության համար անհրաժեշտ յուրաքանչյուր քայլ կձեռնարկվի վճռականորեն և առանց տատանման։ Մենք հիշեցնում ենք բոլոր կողմերին, որ մեր իրավունքն է՝ արձագանքել մեր երկրի դեմ ուղղված ցանկացած թշնամական գործողության»,- ասվում է Թուրքիայի ՊՆ-ի հայտարարությունում։
Անկարան նաև զգուշացրել է բոլոր կողմերին՝ չձեռնարկել այնպիսի քայլեր, որոնք կարող են հանգեցնել հակամարտության հետագա տարածմանը տարածաշրջանում՝ հայտարարելով, որ այս հարցում կշարունակի խորհրդակցությունները ՆԱՏՕ-ի և այլ դաշնակիցների հետ։
Թարգմանությունը՝ Էմմա Չոբանյանի
