ԱՄՆ-ն խորտակել է Երկրորդ համաշխարհայինից ի վեր ամենամեծ ռազմանավը՝ իրանական «Shahid Bahman Bagheri»-ն

ԱՄՆ-ը խորտակել է Երկրորդ համաշխարհային պատերազմից ի վեր ամենամեծ ռազմանավը՝ իրանական անօդաչու թռչող սարքերը կրող «Shahid Bahman Bagheri»-ն, որն Իսլամական հեղափոխության պահապանների կորպուսի նավատորմի հպարտությունն էր։ Die Welt-ի տվյալներով՝ սա աշխարհում առաջին նավն էր, որը նախատեսված էր բացառապես հարձակողական անօդաչուներ տեղափոխելու համար։ Նավը կարող էր նաև տեղափոխել հրթիռներ, ուղղաթիռներ, նույնիսկ փոքր նավեր։ ԱՄՆ ռազմական հրամանատարության հրապարակված հայտարարության համաձայն՝ նավը խորտակվել է Պարսից ծոցում՝ փետրվարի 28-ին ռազմական գործողությունների սկսվելուց «կարճ ժամանակ անց»։

Նավն ուներ շուրջ 42,000 տոննա ջրատարողություն, ինչն այն դարձնում է Երկրորդ համաշխարհային պատերազմից ի վեր խորտակված ամենամեծ ռազմանավը: Համեմատության համար, 1941 թվականին խորտակված ամենամեծ գերմանական ռազմանավը՝ «Բիսմարկը», ուներ ավելի քան 50,000 տոննա ջրատարողություն: 2022 թվականի ապրիլին Սև ծովի հատակում հայտնված «Մոսկվա» կառավարվող հրթիռներով հածանավն ուներ 11,500 տոննա ջրատարողություն:

Մինչ այդ, իրանական բանակը պնդում է, որ լիակատար վերահսկողություն ունի Հորմուզի նեղուցի նկատմամբ, որը նավթի և գազի փոխադրման կարևորագույն երթուղի է: Ռազմածովային ուժերի խոսնակ Մոհամմադ Աքբարզադեն հայտարարել է, որ այս երթուղով անցնելու փորձ կատարող ցանկացած նավ կարող է ենթարկվել իրանական հրթիռների կամ անօդաչու թռչող սարքերի հարձակման:

Ավելի վաղ ԱՄՆ նախագահ Դոնալդ Թրամփը հայտարարել էր, որ ԱՄՆ ռազմածովային ուժերը պատրաստ են պաշտպանել Հորմուզի նեղուցով անցնող նավթատար նավերը: Մինչդեռ, ԱՄՆ բանակը հայտնել է, որ Իրանի դեմ պատերազմի սկզբից ի վեր ոչնչացվել է 17 իրանական նավ, այդ թվում՝ սուզանավ, իսկ երկրի ներսում հարված է հասցվել գրեթե 2000 թիրախի:

«Այսօր Պարսից ծոցում, Հորմուզի նեղուցում կամ Օմանի ծոցում չկա ոչ մի իրանական նավ»,- հայտարարել է ԱՄՆ ռազմածովային ուժերի ծովակալ Բրեդ Քուփերը: