Թուրքիայի ԱԳ նախարարը Իրանի կողմից Պարսից ծոցի երկրներին հարվածները «սխալ ռազմավարություն» է անվանել

Թուրքիայի արտաքին գործերի նախարար Հաքան Ֆիդանը հայտարարել է, որ Իրանի կողմից Պարսից ծոցի երկրների վրա պատասխան հարձակումները «սխալ ռազմավարություն» են, որը մեծացնում է ավելի լայն տարածաշրջանային հակամարտության ռիսկը, գրում է Turkish Minute-ը։

Թուրքական TRT-ին տված հարցազրույցում Ֆիդանը նշել է, որ Իրանը ռմբակոծում է արաբական երկրները՝ «առանց որևէ տարբերակում դնելու», մասնավորապես, Օմանին, Կատարին, Քուվեյթին, Բահրեյնին, Սաուդյան Արաբիային, Արաբական Միացյալ Էմիրություններին և Հորդանանին։ Նա ասել է, որ հարձակումները մեծացնում են ռիսկը ամբողջ տարածաշրջանում և սխալ են նաև Իրանի տեսանկյունից։

Մեկնաբանությունները հնչում են այն ժամանակ, երբ ԱՄՆ-ի և Իսրայելի կողմից Իրանի վրա հարվածներով սկսված մարտական ​​գործողությունները տարածվել են ամբողջ Մերձավոր Արևելքում․ Իրանը հրթիռներ և անօդաչու թռչող սարքեր է արձակել, իսկ Իսրայելը հետագա հարվածներ հասցրել։

Իրանին սահմանակից և ՆԱՏՕ-ի անդամ Թուրքիան կոչ է արել վերադառնալ դիվանագիտությանը, նաև բանակցություններ վարել մի շարք կառավարությունների հետ հարձակումները դադարեցնելու քայլերի վերաբերյալ։

Ֆիդանը նշել է, որ Իրանը հաշվարկված գնահատական ​​է տվել, որ ռեժիմի նկատմամբ ցանկացած գոյության սպառնալիք պետք է հանգեցնի առավելագույն տարածաշրջանային վնասի: Նա բացատրել է, որ Թեհրանը խորապես գիտակցում է, թե որքան կարևոր են հարևան երկրների էներգետիկ ենթակառուցվածքները համաշխարհային տնտեսության համար, և այդ խոցելիությունն օգտագործում է որպես լծակ։

«Իրանը հետապնդում է՝ «եթե ես խորտակվեմ, տարածաշրջանը կտանեմ ինձ հետ» ռազմավարությունը և թիրախավորում այլ երկրների էներգետիկ ենթակառուցվածքները, հատկապես՝ կարևորագույնները»,- ասել է Ֆիդանը:

Նա հավելել է, որ Իրանի դեմ ռազմական հարվածների ուժգնացմանը զուգընթաց՝ Թեհրանը սրում է տարածաշրջանային էներգետիկ ակտիվների վրա հարձակումները՝ իր դեմ ուղղված ուժերի վրա ճնշում գործադրելու համար, ինչը փաստացիորեն Պարսից ծոցի փոխկապակցված նավթագազային ցանցերը վերածում է զսպման զենքի։ Այս մոտեցումը Թեհրանի կողմից լուրջ ռիսկ է, որը սպառնում է վերածվել ճգնաժամի՝ համաշխարհային էներգետիկ շուկաների և տնտեսական կայունության համար հեռահար հետևանքներով, եզրափակել է Ֆիդանը։

Թարգմանությունը՝ Էմմա Չոբանյանի