«Ռոսատոմ»-ը կորցրել է կապը Իրանի միջուկային ոլորտի ղեկավարության հետ. Բուշերի ԱԷԿ-ի  աշխատանքները դադարեցվել են

«Ռոսատոմ»-ի աշխատակիցները չեն կարողանում կապ հաստատել Իրանի միջուկային արդյունաբերության ղեկավարության հետ Մերձավոր Արևելքում պատերազմի պատճառով։ Այս մասին ասել է Ռուսաստանի պետական ​​կորպորացիայի ղեկավար Ալեքսեյ Լիխաչովը, գրում է Meduza-ն։

«Իրանի միջուկային արդյունաբերության ոլորտի  ղեկավարության հետ կապ չկա՝ ո՛չ հեռախոսային, ո՛չ էլ էլեկտրոնային փոստի… Մենք նույնիսկ չենք կարող գնահատել նրանց ֆիզիկական վիճակը այս պահին»,- նրա խոսքերն է մեջբերում «ՌԻԱ Նովոստի»-ն։

Լիխաչովը նշել է, որ ՄԱԿ-ի Ատոմային էներգիայի գործակալությունը (ՄԱԳԱՏԷ) հրապարակել է Իրանի միջուկային օբյեկտներին հարվածների լուսանկարներ, սակայն «Ռոսատոմը» «պատկերացում չունի ավերածությունների մասշտաբների մասին»։

Ռազմական գործողությունների պատճառով Բուշերի ատոմակայանում, որն Իրանը կառուցում է «Ռոսատոմ»-ի հետ համատեղ, աշխատանքները լիովին դադարեցվել են, ասել է ռուսական  կորպորացիայի ղեկավարը։ Ներկայում կայանում 639 ռուս աշխատակից կա։

«Մեր գործընկերներից մի քանիսը Թեհրանում էին և արդեն լքում են երկիրը։ Մենք նաև աստիճանաբար կտարհանենք Բուշերի ատոմակայանը, քանի որ անջատումները և հարվածների միջև ընկած ժամանակահատվածում ընդմիջումները շարունակվում են»,- հայտարարել է Լիխաչովը։

Ըստ նրա՝ Բուշերի ատոմակայանը մնում է Ռուսաստանի համար առաջնահերթ նախագիծ, և «մեր ժողովուրդը այնտեղ կմնա ցանկացած դեպքում»։

«Մենք հասկանում ենք մեր պատասխանատվությունը Իրանի ժողովրդի և կառավարության առջև», – ասել է Լիխաչովը։

«Ռոսատոմ»-ի ղեկավարն ընդգծել է, որ Բուշերի ատոմակայանի վրա հնարավոր ռազմական հարվածը կհանգեցնի «տարածաշրջանային մասշտաբի աղետի և  դա հակամարտության բոլոր կողմերը պետք է հասկանան»։

Թարգմանությունը՝ Էմմա Չոբանյանի