03.03.2026 | 19:39
Միրզոյանը և Կալասն ընդգծել են ՀՀ-ԵՄ օրակարգն առաջ մղելու հարցում ակտիվ ներգրավվածությունը
Կրեմլը չգիտի՝ երբ տեղի կունենա Ուկրաինայի և ԱՄՆ-ի հետ խաղաղության բանակցությունների նոր փուլը
Քաղաքականություն
03.03.2026 | 18:10
Կրեմլը «հստակություն չունի» Ռուսաստանի, Ուկրաինայի և Միացյալ Նահանգների պատվիրակությունների միջև խաղաղության բանակցությունների հաջորդ փուլի ժամանակացույցի և վայրի վերաբերյալ: Նոր հանդիպումը նախատեսվում էր անցկացնել Աբու Դաբիում այս շաբաթ։
«Այս պահին Աբու Դաբիում հանդիպումը քիչ հավանական է՝ ակնհայտ պատճառներով»,- ճեպազրույցի ժամանակ ասել է Ռուսաստանի նախագահի մամուլի քարտուղար Դմիտրի Պեսկովը, գրում է Meduza-ն։
Հարցին՝ արդյո՞ք ԱՄՆ-ի ներգրավվածությունը Իրանի դեմ ռազմական գործողություններին կազդի խաղաղության բանակցություններում ամերիկյան դիրքորոշման վրա, Պեսկովը պատասխանել է․ «Կտեսնենք, ժամանակը ցույց կտա։ Դեռևս որևէ ցուցում չկա դրա հետ կապված։ Բայց պարզ է, որ ամերիկացիների մոտ աշխատանքն այս օրերին ավելացել է»։
Նախօրեին Ուկրաինայի նախագահ Վլադիմիր Զելենսկին նույնպես հայտարարել էր, որ Մերձավոր Արևելքում պատերազմի պատճառով չի կարող հաստատել Աբու Դաբիում Ռուսաստանի, Ուկրաինայի և ԱՄՆ-ի միջև եռակողմ հանդիպումը։ Սակայն նա ընդգծել էր, որ հանդիպումը ոչ ոք չի չեղարկել։
Ուկրաինան, Ռուսաստանը և ԱՄՆ-ն 2026 թվականի սկզբից ի վեր անցկացրել են եռակողմ բանակցությունների մի քանի փուլ։ Պատվիրակությունները հանդիպել են Աբու Դաբիում հունվարին և փետրվարի սկզբին, իսկ փետրվարի կեսերին՝ Ժնևում։
Թարգմանությունը՝ Էմմա Չոբանյանի
