Իրանը հայտարարել է, որ Հորմուզի նեղուցը փակ է և կրակի կտա անցնել փորձող նավերը

Իրանի Իսլամական հեղափոխության պահապանների կորպուսի (ԻՊՀԿ) բարձրաստիճան պաշտոնյան հայտարարել է, որ Հորմուզի նեղուցը փակ է, և Իրանը կրակի կտա ցանկացած նավ, որը կփորձի անցնել, հաղորդում են իրանական լրատվամիջոցները, գրում է Reuters-ը։

Սա Իրանի ամենաակնհայտ նախազգուշացումն է այն բանից հետո, երբ շաբաթ օրը հայտարարեց, որ կփակի արտահանման երթուղին՝ սպառնալով կրճատել համաշխարհային նավթի մատակարարումների մեկ հինգերորդը և կտրուկ բարձրացնել նավթի գները։

«[Հորմուզի] նեղուցը փակ է։ Եթե որևէ մեկը փորձի անցնել, Հեղափոխության պահապանների կորպուսի և կանոնավոր նավատորմի հերոսները կհրկիզեն այդ նավերը»,- պետական ​​լրատվամիջոցների կողմից տարածված հայտարարության մեջ ասել է ԻՀՊԿ գլխավոր հրամանատարի ավագ խորհրդական Էբրահիմ Ջաբարին։

Նեղուցն աշխարհի ամենակարևոր նավթի արտահանման ուղին է, որը կապում է Պարսից ծոցի խոշորագույն նավթ արտադրողներին, ինչպիսիք են Սաուդյան Արաբիան, Իրանը, Իրաքը և Միացյալ Արաբական Էմիրությունները, Օմանի ծոցի և Արաբական ծովի հետ։ Փակման պատճառը փետրվարի 28-ին ԱՄՆ-ի և Իսրայելի կողմից Իրանի վրա հարվածներն են, որոնք նպատակ ունեին տապալել երկրի առաջնորդներին, իսկ ԱՄՆ նախագահ Դոնալդ Թրամփն իրանցիներին առաջարկել էր օգնել իշխող հոգևորականներին տապալելու հարցում։

Ի պատասխան՝ Իրանը հրթիռային հարվածներ է հասցրել Պարսից ծոցի իր հարևաններին, որտեղ տեղակայված են ԱՄՆ ռազմական բազաները, ինչպիսիք են Կատարը, Քուվեյթը և Բահրեյնը։ Թեհրանը նաև հրթիռներ է արձակել Արաբական Միացյալ Էմիրությունների, Սաուդյան Արաբիայի և Օմանի վրա։

Նեղուցի փակմամբ Թեհրանը կատարում է տարիների սպառնալիքները՝ փակել նեղ ջրային ճանապարհը՝ ի պատասխան Իսլամական Հանրապետության վրա ցանկացած հարձակման։

Աշխարհի օրական նավթի սպառման շուրջ 20%-ն անցնում է Հորմուզի նեղուցով, որի ամենափոքր կետում լայնությունը մոտ 33 կիլոմետր է (21 մղոն): Նավթի շուկաները կենտրոնացել են Թեհրանի և նրա հին թշնամիների՝ ԱՄՆ-ի և Իսրայելի միջև լարվածության վրա՝ վախենալով, որ լայնածավալ հակամարտությունը կխաթարի մատակարարումները և կապակայունացնի տարածաշրջանը:

Այս քայլը նաև տեղի է ունենում այն բանից հետո, երբ համաշխարհային նավագնացությունն արդեն խափանվել է Եմենի՝ Իրանին դաշնակից հութի զինյալների կողմից իրականացված անօդաչու թռչող սարքերի և հրթիռների հարձակումների պատճառով: 2023 թվականին Գազայի պատերազմի սկսվելուց ի վեր խմբավորումը թիրախավորել էր Կարմիր ծովում և Ադենի ծոցում նավերին:

Թարգմանությունը՝ Էմմա Չոբանյանի