Մակրոնը հայտարարել է, որ Ֆրանսիան կմեծացնի իր միջուկային զինանոցը

Ֆրանսիան կմեծացնի իր միջուկային զինանոցը և կամրապնդի իր զսպման ուժը՝ հաշվի առնելով գլոբալ հակամարտությունների միջուկային շեմը հատող ռիսկի աճը։ Այս մասին հայտարարել է նախագահ Էմանուել Մակրոնը, գրում է Reuters-ը։

«Մենք այժմ ապրում ենք աշխարհաքաղաքական ցնցումների մի շրջան, որը լի է ռիսկերով»,- Բրետանում գտնվող սուզանավային բազայից ունեցած ելույթում ասել է Մակրոնը՝ հավելելով, որ անհրաժեշտ է ֆրանսիական զսպման մոդելի «կոշտացում»։

Մակրոնը նշել է, որ նոր մարտագլխիկների քանակի վերաբերյալ կոնկրետ տվյալներ չեն հրապարակվի։

«Ազատ լինելու համար պետք է վախ ներշնչել։ Վախ ներշնչելու համար պետք է ուժեղ լինել»,- հայտարարել է Ֆրանսիայի նախագահը։

Ֆրանսիան ներկայում ունի 280-290 մարտագլխիկ։

Մակրոնի խոսքով՝ իր կողմից հայտարարված միջուկային դոկտրինի փոփոխությունները քննարկվել են ԱՄՆ-ի և Մեծ Բրիտանիայի ներկայացուցիչների հետ, որոնք նույնպես ունեն միջուկային զինանոցներ: Նա նաև նշել է, որ Գերմանիան Ֆրանսիայի առանցքային գործընկերն է միջուկային զսպման ոլորտում։

«Այս համագործակցության շրջանակում առաջին քայլերը կսկսվեն այս տարի. դրանք կարող են ներառել այցելություններ ռազմավարական վայրեր, ինչպես նաև համատեղ զորավարժություններ»,- հայտարարել է Մակրոնը։

Նա նաև նշել է, որ Լեհաստանը, Նիդերլանդները, Բելգիան և Դանիան կկարողանան մասնակցել ֆրանսիական միջուկային ռազմական խաղերին, միաժամանակ, հստակեցրել է, որ միջուկային հարվածների վերաբերյալ որոշումների կայացումը կմնա բացառապես Ֆրանսիայի նախագահի ձեռքում։

Ֆրանսիայի առաջնորդը հավելել է, որ անորոշ հանգամանքներում հնարավոր կլինի ստեղծել ռազմավարական ակտիվներ այլ եվրոպական երկրներում, որոնք կմիանան այն նոր «առաջխաղացման զսպման» դոկտրինային։

Թարգմանությունը՝ Էմմա Չոբանյանի