07.09.2026 | 14:59
Պեսկովը հայտնել է Փաշինյան-Պուտին հանդիպման օրակարգը
Քուվեյթում ամերիկյան F-15 է կործանվել. ՏԵՍԱՆՅՈՒԹ
Քաղաքականություն
02.03.2026 | 11:19
ԱՄՆ ռազմաօդային ուժերի F-15 կործանիչ է վթարի ենթարկվել Քուվեյթի հյուսիսում՝ Իրաքի սահմանի մոտ, օդաչուն անվտանգ կերպով կատապուլտացվել է։ Ինքնաթիռը վթարի է ենթարկվել սահմանի մոտ գտնվող նոսր բնակեցված վայրում, որտեղ Խոր Աբդուլլահ ջրային ճանապարհը բաժանում է Իրաքը և Քուվեյթը։ Լրատվամիջոցների աղբյուրների համաձայն՝ տեղացիներն օգնել են օդաչուին պատահարից հետո։
Սոցցանցերում շրջանառվող տեսանյութերում, ենթադրաբար, վթարի վայրից ծուխ է երևում։ Մոտավորապես նույն ժամանակ Քուվեյթի որոշ հատվածների բնակիչները հայտնել են պայթյունների և օդային հարձակման ազդանշանների մասին։
Դեռևս որևէ տեղեկություն չի հրապարակվել վթարի պատճառի մասին։ Հաղորդվում է, որ պատահարը տեղի է ունեցել ԱՄՆ ռազմաօդային ուժերի կողմից «բարեկամական կրակի» հետևանքով, չնայած պաշտոնական մանրամասները դեռևս չեն հրապարակվել ԱՄՆ կենտրոնական հրամանատարության կամ Պենտագոնի կողմից։
Ականատեսները հայտնում են, որ Քուվեյթում ԱՄՆ դեսպանատան մոտակայքում ծուխ է բարձրացել, իսկ տարածքում նկատվել են հրշեջներ և շտապօգնության մեքենաներ:
Քուվեյթում ԱՄՆ դեսպանատունը կոչ է արել քաղաքացիներին խուսափել դեսպանատուն գնալուց և ապաստան գտնել իրենց տներում։
«Մի՛ եկեք դեսպանատուն։ Թաքնվեք ձեր բնակարանում՝ ամենացածր հարկում և պատուհաններից հեռու: Դուրս մի՛ եկեք»,- ասվում է դեսպանատան կայքում հրապարակված ուղեցույցում:
Դեսպանատունը նաև կոչ է արել Քուվեյթում գտնվող ԱՄՆ քաղաքացիներին «պատսպարվել տեղում, վերանայել անվտանգության ծրագրերը հարձակման դեպքում և զգոն լինել ապագա նոր հարձակումների դեպքում»:
Թարգմանությունը՝ Էմմա Չոբանյանի
