30.09.2026 | 14:01
Մեծ Բրիտանիայի պաշտպանության նախարարը Բաքվում է
ՌԴ քաղաքացիները կարող են Իրանից Ռուսաստան վերադառնալ Հայաստանի տարածքով․ ՀՀ-ում ՌԴ դեսպանություն
Քաղաքականություն
01.03.2026 | 16:41
Մերձավոր Արևելքում էսկալացիայի կապակցությամբ հիշեցնում ենք, որ Ռուսաստանի Դաշնության քաղաքացիները կարող են Իրանից Ռուսաստան վերադառնալ Հայաստանի տարածքով։ Այս մասին հայտարարություն է տարածել ՀՀ-ում ՌԴ դեսպանությունը։
«Ներկայումս հայ-իրանական սահմանին շուրջօրյա ռեժիմով շարունակում է գործել «Նուրդուզ»/«Ագարակ» սահմանային անցակետը (КПП)։
Իրանի և Հայաստանի միջև սահմանը Ռուսաստանի քաղաքացիների համար բաց է․ մուտքն ազատ է՝ գործող արտասահմանյան կամ ներքին անձնագրերով։ Նախնական ծանուցում չի պահանջվում։
Սահմանը հատելուց հետո խորհուրդ ենք տալիս շարունակել ճանապարհը դեպի Երևան կամ Գյումրի, որոնք ունեն ուղիղ օդային հաղորդակցություն Ռուսաստանի քաղաքների հետ»,-նշվում է հաղորդագրության մեջ։
Հիշեցնենք՝ փետրվարի 28-ին ԱՄՆ-ն և Իսրայելը հարվածներ էին հասցրել Իրանի ռազմական օբյեկտներին, ինչին ի պատասխան Թեհրանը սկսել է հրթիռային և անօդաչու հարձակումներ իրականացնել Իսրայելի և Պարսից ծոցի երկրների օբյեկտների վրա։
Իրանը պատասխան հարվածներ է հասցրել Իսրայելի տարածքին և Մերձավոր Արևելքում գտնվող ԱՄՆ ռազմական բազաներին։ Իսրայելում հայտարարվել է արտակարգ դրություն։ Իրանի պատասխան հարվածները ազդել են նաև տարածաշրջանի այլ երկրների վրա։
Եվրամիությունը հայտնել է Մերձավոր Արևելքում տեղի ունեցող իրադարձությունների կապակցությամբ լուրջ մտահոգության մասին։ Գերմանիայի, Ֆրանսիայի և Մեծ Բրիտանիայի առաջնորդները խստորեն դատապարտել են տարածաշրջանի երկրների դեմ իրանական հարձակումները՝ Թեհրանին կոչ անելով բանակցությունների։
