07.09.2026 | 15:32
Աղիքային վարակի գանգատներով 3 անձ Բյուրեղավանից հոսպիտալացվել է «Աբովյան» ԲԿ-ում
ՌԴ 11 շրջաններում հայտարարվել է հրթիռային վտանգի ռեժիմ. Չուվաշիայում խոցվել են ուկրաինական «Ֆլամինգո» հրթիռներ
Քաղաքականություն
27.02.2026 | 21:14
Փետրվարի 27-ի ցերեկը Ռուսաստանի առնվազն 11 շրջաններում հրթիռային վտանգի ռեժիմ է հայտարարվել։ Պենզայի, Սվերդլովսկի, Օրենբուրգի, Սամարայի և Սարատովի մարզերի, Չուվաշիայի, Ուդմուրտիայի, Թաթարստանի և Բաշկորտոստանի հանրապետությունների, ինչպես նաև Պերմի երկրամասի իշխանությունները նախազգուշացրել են հնարավոր հարձակման մասին։
Ռոստովի մարզի իշխանությունները նույնպես հայտնել են հրթիռային հարձակման մասին: Տագանրոգում Ցիոլկովսկի փողոցի բազմաբնակարան շենքի պատշգամբը մասամբ փլուզվել է հրթիռի բեկորների ընկնելու հետևանքով: Վիրավորների մասին տեղեկություններ չկան, գրում է Meduza-ն։
Չուվաշիայի կառավարությունը հայտարարել է, որ իրենց տարածքում երկու հրթիռներից մեկը խփվել է, իսկ երկրորդը «փոխել է ուղղությունը և թռել դեպի հարևան հանրապետություն»։ Անվտանգության ուժերի հետ սերտորեն կապված Shot տելեգրամ ալիքը պնդում է, որ Չուվաշիայի վրա խոցվել են երկու ուկրաինական «Ֆլամինգո» հրթիռներ։
Լայնածավալ ռուս-ուկրաինական պատերազմի սկսվելուց ի վեր առաջին անգամ հրթիռային վտանգ է հայտարարվել Պերմի երկրամասում, Սվերդլովսկի մարզում և Թաթարստանում։
Արտակարգ իրավիճակների նախարարությունը որոշ ժամանակ անց հայտարարել է, որ հրթիռային վտանգի ռեժիմը հանվել է Պենզայի, Սամարայի, Սարատովի և Օրենբուրգի մարզերում, ինչպես նաև Չուվաշիայի, Ուդմուրտիայի, Թաթարստանի և Բաշկորտոստանի հանրապետություններում, նաև Պերմի երկրամասում:
Ուկրաինայի զինված ուժերի գլխավոր շտաբը հայտնել էր, որ փետրվարի 21-ի գիշերը ուկրաինական զորքերը «Ֆլամինգո» հրթիռներով հարված են հասցրել Ուդմուրտիայի Վոտկինսկի գործարանին, որտեղ արտադրվում են ռուսական «Յարս», «Բուլավա» և «Իսկանդեր» բալիստիկ հրթիռները։
Թարգմանությունը՝ Էմմա Չոբանյանի
