Հասարակություն
26.02.2026 | 14:15ԱԺ պետական-իրավական հարցերի մշտական հանձնաժողովի նիստում քննարկվել է Հակակոռուպցիոն կոմիտեի մասին օրենքում փոփոխությունների նախագիծը, որով նախատեսվում է կոմիտեն գործառույթներով և լիազորություններով համանմանեցնել Քննչական կոմիտեին։ Նախագծով առաջարկվում է Հակակոռուպցիոն կոմիտեի նախագահին իրավունք տալ կոմիտեին աջակցող անձանց ոչ միայն շնորհակալագրով ու դրամական պարգևով, այլ նաև մեդալով կամ կրծքանշանով պարգևատրել։
«Ըստ էության, օժանդակող անձանց չի տրամադրվել։ Օժանդակող անձ ասելով նկատի ունենք, որ Հակակոռուպցիոն կոմիտեի ծառայող չեն հանդիսանում։ Անհրաժեշտությունն ինչով է պայմանավորված՝ կդժվարանամ ասել, ըստ էության, դա կոմիտեի գործունեությանը օժանդակող անձանց գնահատելու, շնորհակալ լինելու տարբերակ է։ Օրինակ, եթե Հակակոռուպցիոն կոմիտեի քննիչները Քննչական կոմիտեի վարույթում գտնվող ինչ-որ գործով աջակցություն են ցուցաբերում, և Քննչական կոմիտեի նախագահը որոշում է Հակակոռուպցիոն կոմիտեի քննիչին որպես օժանդակող անձ համագործակցության մեդալ տալ, հակառակ դեպքում էլ Հակակոռուպցիոն կոմիտեի նախագահը կկարողանա Քննչական կոմիտեի քննիչին էլի համագործակցության համար մեդալ տալ»,- ԱԺ Պետական-իրավական հարցերի մշտական հանձնաժողովի նիստում ասաց ՀՀ արդարադատության նախարարի տեղակալ Տիգրան Դադունցը։
Հանձնաժողովի նախագահ Վլադիմիր Վարդանյանն էլ ընդգծեց, որ նախագիծը հիմնված է սիմետրիկ մոտեցման վրա․ եթե նույն գործառույթը կատարող մարմիններից մեկում նման հնարավորություն կա, ապա այն պետք է լինի նաև մյուսում։ Նա հիշեցրեց նաև Սահմանադրական դատարանի նախկին դիրքորոշումը, ըստ որի՝ քննիչի գործառույթը նույնն է՝ անկախ նրանից, թե որ պետական մարմնում է այն իրականացվում։
Նախագիծը հանձնաժողովում ստացավ դրական եզրակացություն։
Մանրամասները՝ տեսանյութում։
