Կիսատ նախընտրական ժեստ է, ինչ-որ իմաստով ընտրակաշառքի տրամաբանությամբ արվող. Չալաբյանը՝ կենսաթոշակների բարձրացման մասին

«Կենսաթոշակների բարձրացումն ուշացած և կիսատ քայլ է»,- Կառավարության շենքի դիմաց հրավիրած ասուլիսի ժամանակ այսպես է արձագանքել «Հայաքվե» նախաձեռնության անդամ Ավետիք Չալաբյանը կենսաթոշակները ապրիլի 1-ից բարձրացնելու հարցին ի պատասխան։

Ըստ Չալաբյանի՝ «Հայաքվեն» դեռևս անցած տարվա սեպտեմբերից էր բարձրաձայնում երկրում կենսաթոշակների անթույլատրելի և անհիմն ցածր լինելու հարցը: Նրա խոսքով՝ Կառավարությունն ի սկզբանե կոշտ դիմադրում էր կենսաթոշակները բարձրացնելու պահանջին՝ այն որակելով որպես «պոպուլիզմ» և «հիբրիդային պատերազմ» իշխանության դեմ։ Նա հիշեցրեց «Հայաքվեի» հիմնական պահանջը՝ բարձրացնել կենսաթոշակներն առնվազն 50%-ով և ապահովել ամենամյա ինդեքսավորում։

«Մենք համարում ենք, որ այս քայլը ընդամենը մի կիսատ նախընտրական ժեստ է, կարելի ա ասել, ինչ-որ իմաստով ընտրակաշառքի տրամաբանությամբ արվող և բնավ չի սպառում այն օրակարգը, որով մենք դուրս ենք եկել պայքարի։ Տեղեկացնեմ ձեզ, որ դեկտեմբեր ամսից սկսած մենք ստորագրահավաք ենք իրականացնում, որպեսզի մեր հանրության պահանջը ներկայացնենք Հայաստանի Հանրապետության իշխանություններին. արդեն մի քանի տասնյակ հազար ստորագրություններ են հավաքվել այդ պահանջի տակ, որն է՝ առնվազն 50%-ով բարձրացնել կենսաթոշակները և հետո շարունակել դրանց ինդեքսավորումը: Ուստի՝ մենք արձանագրում ենք սա որպես առաջին փոքր հաղթանակ, բայց մեր պայքարը շարունակում ենք, մինչև մեր պահանջները ամբողջովին բավարարված կլինեն»,- ասաց նա։

Անդրադառնալով էկոնոմիկայի նախարար Գևորգ Պապոյանի այն հայտարարությանը, թե ընդդիմադիրները փորձում են իշխանության արածը վերագրել իրենց՝ Չալաբյանը արձագանքեց. «Սա մեր քաղաքացիների հաղթանակն է և այս վարչախմբի պարտությունը, քանի որ նա մինչև վերջին շունչը փորձում էր դիմադրել հանրության շատ բնական պահանջին»:

Երեկ վարչապետ Նիկոլ Փաշինյանը հայտարարեց, որ Հայաստանում ապրիլի 1-ից կենսաթոշակները կբարձրանան։ 

«Ընդ որում, համեմատաբար ցածր կենսաթոշակները կբարձրանան 10 հազար դրամով, ավելի բարձրները՝ ավելի քիչ։ Այս հաշվարկների մեջ չկա անկանխիկ առևտրից ստացվող հետվճարը, այսինքն՝ կենսաթոշակները բարձրանում են իմ նշած սանդղակներից ավելի շատ։ Հետվճարն արդեն առանձին հաշվարկ է, որի մասին բազմիցս խոսել ենք»,- ասել էր Փաշինյանը։ 

Անի Թամրազյան