Մարդու իրավունքները հաճախ գործիք են դառնում քաղաքական դերակատարների ձեռքին․ Անահիտ Մանասյան․ ՏԵՍԱՆՅՈՒԹ

Հայաստանում հատկապես տեսանելի է մարդու իրավունքների զգայուն թեմաների գործիքայնացումը ընտրություններին նախորդող ժամանակահատվածում: Այս մասին «Խոսքի և մամուլի ազատության և տեղեկատվության հասանելիության խթանումը Հայաստանում» ծրագրի մեկնարկի ժամանակ հայտարարեց Մարդու իրավունքների պաշտպան Անահիտ Մանասյանը։

«Թերևս ամենահայտնի օրինակներից մեկը հենց Եվրոպայի խորհրդի կոնվենցիաներից մեկին է վերաբերում, մասնավորապես՝ Ստամբուլյան կոնվենցիային, որը շատ կարևոր գործիք է ընտանեկան բռնության դեմ պայքարի համար, այդ թվում՝ կանանց, երեխաների նկատմամբ բռնության դեմ պայքարի համար, որի առնչությամբ գրեթե բոլոր քաղաքական դերակատարներն են մշտապես շատ այսպես կարևոր մտքեր արտահայտում: Բայց, օրինակ, հենց այս կոնվենցիան է գործիքայնացվել ընտրություններին նախորդող ժամանակահատվածում և միանշանակ օգտագործվում է տարբեր քաղաքական նպատակներով՝ նախ ձևախեղված տպավորություններ ստեղծելով, այդ թվում՝ ընտանեկան բռնության հետ կապված տարատեսակ հարցերի առնչությամբ»,- նշեց Մանասյանը:

Նրա խոսքով՝ հատկապես նախընտրական ժամանակահատվածում ու ընտրությունների ընթացքում հաշմանդամությունը գործիքայնացվում է քաղաքական խոսույթի համատեքստում:

«Օրինակ՝ շատ հաճախ կարելի է հանդիպել տարբեր քաղաքական հայտարարությունների, որոնք, ըստ էության, ուղղված են որևէ այլ քաղաքական դերակատարի թիրախավորելուն, բայց ամբողջ այդ ձևակերպման պրոցեսը իր մեջ պարունակում է հենց հաշմանդամություն ունեցող անձանց թիրախավորում: Հատկանշական էր, որ մեր մոնիթորինգի արդյունքները ցույց էին տվել, որ Եվրոպայի խորհրդի Մարդու իրավունքների հանձնակատարի Հայաստան այցի ընթացքում նույնիսկ այդ այցի հետ կապված բազմաթիվ քաղաքական դիտարկումներ հենց հաշմանդամություն ունեցող անձանց թիրախավորելու միջոցով էին իրականացվում՝ օգտագործելով, օրինակ, «խուլուհամր», «այս մարդիկ խուլուհամր են» և նման այլ ձևակերպումներ, որոնք իրապես խնդրահարույց են»,- նշեց Մարդու իրավունքների պաշտպանը։

Մանրամասները՝ տեսանյութում։