«Այսօր լրանում է ուղիղ չորս տարին, ինչ Պուտինը երեք օրում գրավում է Կիևը». Զելենսկի

Ուկրաինայի նախագահ Վլադիմիր Զելենսկին տեսաուղերձ է հրապարակել Ռուսաստանի լայնածավալ ներխուժման չորրորդ տարելիցի կապակցությամբ և ցուցադրել է իր բունկերը, գրում է Current time-ը։

«Այսօր լրանում է ուղիղ չորս տարին, ինչ Պուտինը երեք օրում գրավում է Կիևը։ Եվ սա շատ բան է ասում մեր դիմադրության,  այս ամբողջ ընթացքում Ուկրաինայի պայքարի մասին։ Այս խոսքերը  մեր միլիոնավոր մարդկանց մասին են, մեծ քաջության, քրտնաջան աշխատանքի, տոկունության և այն երկար ճանապարհի մասին, որն Ուկրաինան անցում է փետրվարի 24-ից ի վեր», – նշել է նա։

Զելենսկին ելույթը  տեսագրել է Բանկովա փողոցի նախագահական գրասենյակի տակ գտնվող բունկերից։ Նա ասել է, որ իր առաջին բանակցություններն անցկացրել է բունկերի գրասենյակում՝ լայնածավալ պատերազմի սկզբում, որտեղ աշխատում էին հարյուրավոր մարդիկ։

Նրա խոսքով՝ բունկերում կառավարությունը և զինվորականները փնտրում էին լուծումներ «Ուկրաինայի գոյատևումն» ապահովելու համար։ Ըստ Զելենսկիի՝ այսօր ուկրաինացիներն ունեն լիակատար իրավունք ասելու, որ պաշտպանել են իրենց անկախությունը և չեն կորցրել պետականությունը. «Պուտինը չի հասել իր նպատակներին։ Նա չի կոտրել ուկրաինացիներին, նա չի հաղթել այս պատերազմում»։

Financial Times-ին տված հարցազրույցում Զելենսկին հայտարարել է, որ Ռուսաստանին չի կարելի վստահել, և որ Դոնբասից զորքերի դուրսբերումը, հավանաբար, չի ավարտի պատերազմը։

«Անկեղծ ասած, ես չեմ կարծում, որ դա է Ռուսաստանի պահանջը՝ մեր դուրս գալը Դոնբասից, և այդ ժամանակ պատերազմը կավարտվի։ Ռուսաստանը Ռուսաստան է, և դուք գիտեք, որ նրանց չի կարելի վստահել»,- ասել է Զելենսկին։

Նա նշել է, որ Ուկրաինայի համար ամենակարևոր հարցը միջազգային անվտանգության երաշխիքներն են, որոնք կարող են կանխել ռուսական կրկնակի հարձակումը։ Ըստ Զելենսկիի՝ Թրամփի վարչակազմը խաղաղության համաձայնագրին համաձայնելու համար ավելի շատ ճնշում է գործադրում Կիևի, քան Մոսկվայի վրա։

Թարգմանությունը՝ Էմմա Չոբանյանի