06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
Այցելեցի Տեր Օշինին․ Ռուբինյանը պնդում է՝ քահանայի ասածը Քրեական օրենսգրքով հետապնդելի է
Քաղաքականություն
23.02.2026 | 17:53
«Վերադառնում եմ Սաղմոսավանքից, Տեր Օշինը, ցավոք, չհերքեց, որ քաղաքացուն ասել է՝ կարևորը քավորը թասիբով մարդ լինի, ՔՊ-ական չլինի»,- այս մասին ֆեյսբուքյան էջում հրապարակած տեսանյութով հայտնել է ԱԺ փոխնախագահ Ռուբեն Ռուբինյանը։
«Ստիպված եղա Տեր Օշինին բացատրել և զգուշացնել, որ եկեղեցում մարդուն քաղաքական հայացքներով կամ կուսակցական պատկանելիությամբ պայմանավորված խտրականության ենթարկելը հակասում է և՛ հոգևոր եկեղեցական կանոնին, և՛ պարունակում է Քրեական օրենսգրքով սահմանված հոդվածի տարրեր։ Սա պիտի հիշեն մեր բոլոր եկեղեցականները՝ հատկապես նրանք, ովքեր եկեղեցին, որտեղ պիտի ծառայեն ժողովրդին, շփոթում են Քոչարյանի կամ օլիգարխների նախընտրական շտաբի հետ»,- ասել է Ռուբինյանը։
Հիշեցնենք, որ ԱԺ փոխխոսնակն ավելի վաղ ֆեյսբուքում գրառում էր արել, թե Տեր Օշինը պսակադրվող զույգին ասել է՝ «կարևորը քավորը նորմալ տղա լինի, թասիբով տղա լինի, նկատի ունեմ՝ ՔՊ-ական չլինի»: Տեր Օշին քահանա Հայրապետյանը Factor TV-ի հետ զրույցում Ռուբինյանին այսպես էր արձագանքել․
«Facebook-ով չի, որ պիտի տարածեն, հանրայնացնեն ինչ-որ մի թեմա։ Եթե հարց ունեն, թող գան, տեղս էլ գիտեն»։
Ստացվում է, Տեր Օշիմի՝ մեզ տված պատասխանից հետո Ռուբեն Ռուբինյանը որոշել է դեմառդեմ հանդիպել քահանային։
Անի Թամրազյան
