27.10.2026 | 23:30
Հայաստանի, Ադրբեջանի և Վրաստանի դեսպանները քննարկել են Հարավային Կովկասի խաղաղության և կայունության ամրապնդման հարցերը
ԱՄՆ մաքսայինը փետրվարի 24-ից կդադարեցնի Թրամփի կողմից սահմանված մաքսատուրքերի գանձումը, որոնք Գերագույն դատարանը անօրինական է ճանաչել
Քաղաքականություն
24.02.2026 | 10:32
ԱՄՆ մաքսային և սահմանային պաշտպանության ծառայությունը (U.S. Customs and Border Protection, CBP) հայտարարել է, որ փետրվարի 24-ին դադարեցնում է ներմուծման տուրքերի գանձումը, որոնք Գերագույն դատարանը փետրվարի 20-ին անօրինական էր ճանաչել:
Reuters-ը նշում է, որ գործակալությունն իր բեռնափոխադրումների համակարգերի հաղորդագրությունների ծառայության (CSMS) միջոցով տեղեկացրել է, որ մաքսային կոդերը կանջատվեն, գրում է The Insider-ը։
CBP-ն չի բացատրել, թե ինչու է շարունակել գանձել տուրքերը Գերագույն դատարանի որոշումից հետո մի քանի օր: CBP-ի հայտարարության մեջ նաև չի նշվում անօրինական կերպով հավաքված միջոցները ներմուծողներին վերադարձնելու մասին:
Փենսիլվանիայի համալսարանի Ուորթոնի դպրոցի տնտեսագետների գնահատականով՝ նախագահ Դոնալդ Թրամփի կողմից Միջազգային արտակարգ տնտեսական լիազորությունների մասին օրենքի (IEEPA) համաձայն սահմանված մաքսատուրքերը, որոնք Գերագույն դատարանը անօրինական է ճանաչել, ապահովել են ավելի քան 500 միլիոն դոլարի եկամուտ: Ներմուծողներին վերադարձի ենթակա ընդհանուր գումարը գնահատվում է 175 միլիարդ դոլար։
Փետրվարի 20-ին ԱՄՆ Գերագույն դատարանը որոշել էր, որ նախագահը լիազորություն չունի ներմուծման մաքսատուրքեր սահմանելու IEEPA-ի համաձայն։ Որոշումը կայացվել է 6-3 ձայների հարաբերակցությամբ։ Թրամփը որոշումը որակել էր «ամոթալի» և պնդել, որ Գերագույն դատարանը գործում է օտարերկրյա պետությունների շահերից ելնելով։
Նույն օրը Թրամփը հայտարարեց 150 օր 10% համաշխարհային մաքսատուրքի սահմանման մասին: Նախագահի խոսքով՝ նոր մաքսատուրքերը, որոնք կփոխարինեն դատարանի կողմից չեղարկված մաքսատուրքերը, կսահմանվեն 1974 թվականի Առևտրի մասին օրենքի 122-րդ հոդվածի համաձայն և կկիրառվեն գործող մաքսատուրքերի ավելացման վրա: 122-րդ հոդվածը թույլ է տալիս նախագահին մինչև 15% մաքսատուրքեր սահմանել մինչև 150 օր՝ վճարային հաշվեկշռի «մեծ և լուրջ» խնդիրներ ունեցող ցանկացած երկրի համար:
Փետրվարի 21-ին Թրամփը հայտարարեց, որ բոլոր երկրների համար ԱՄՆ ներմուծման մաքսատուրքերը կբարձրացնի 10-ով:
Թարգմանությունը՝ Էմմա Չոբանյանի
