04.04.2026 | 10:09
ՀՀ տարածքում ավտոճանապարհները հիմնականում անցանելի են
Թրամփը Պենտագոնին կհանձնարարի հրապարակել ՉԹՕ-ների վերաբերյալ ֆայլերը
Քաղաքականություն
20.02.2026 | 13:03
ԱՄՆ նախագահ Դոնալդ Թրամփը հայտարարել է, որ կհանձնարարի հրապարակել «այլմոլորակայիններին և այլմոլորակային կյանքին» վերաբերող ֆայլերը, գրում է NBC News-ը։
Truth Social-ում նա գրել է, որ «ցուցաբերված հսկայական հետաքրքրության հիման վրա» ինքը կհանձնարարի պաշտպանության նախարար Փիթ Հեգսեթին և այլ համապատասխան գործակալությունների պաշտոնյաներին՝ «սկսել այլմոլորակային կյանքի, չբացահայտված օդային երևույթների (UAP) և չբացահայտված թռչող օբյեկտների (UFO) վերաբերյալ կառավարական ֆայլերի, ինչպես նաև այս բարդ, բայց չափազանց հետաքրքիր և կարևոր հարցերի հետ կապված ցանկացած այլ տեղեկատվության նույնականացման և հրապարակման գործընթաց»։
Թրամփի հայտարարությունը հնչում է այն բանից հետո, երբ ԱՄՆ նախկին նախագահ Բարաք Օբաման փոդքասթի ժամանակ ասել էր, որ այլմոլորակայիններն իրական են՝ ավելի ուշ պարզաբանելով, որ նկատի ունի, թե «մեծ հավանականություն կա, որ այնտեղ կյանք կա»։ Օբաման իր պարզաբանման մեջ նշել էր, որ իր պաշտոնավարման ընթացքում այլմոլորակայինների գոյության «ոչ մի ապացույց» չի տեսել։
«Նրանք իրական են, բայց ես նրանց չեմ տեսել, և նրանք չեն պահվում 51-րդ տարածքում։ Այստեղ ստորգետնյա հաստատություն չկա, եթե միայն չկա դավադրություն, որը նրանք թաքցրել են Միացյալ Նահանգների նախագահից»,- ասել է Օբաման։
Հաղորդավար Բրայան Թայլեր Քոհենի հարցին՝ որն էր առաջին բանը, որը կցանկանար իմանալ պաշտոնը ստանձնելուց հետո, Օբաման պատասխանել է․ «Որտե՞ղ են այլմոլորակայինները»։
ԱՄՆ նախկին նախագահի խոսքերը մեկնաբանելու խնդրանքին Թրամփը պատասխանել է, որ Օբաման գաղտնի տեղեկություններ է տրամադրել։
«Նա չպետք է դա աներ»,- հավելել է Թրամփը։
2024 թվականին լսումներից հետո Պենտագոնը հայտարարել էր, որ ստացել է հարյուրավոր ՉԹՕ-ների մասին հաղորդագրություններ և 21 հաղորդագրություն, որոնք արժանի են «հետագա վերլուծության»՝ «աննորմալ բնութագրերի և/կամ վարքագծի» պատճառով, սակայն չեն գտել այլմոլորակային ակտիվության որևէ ապացույց։
Թարգմանությունը՝ Էմմա Չոբանյանի
