Ուկրաինայի համաձայնագրի շրջանակում ԵՄ-ն մտադիր է պահանջել ռուսական զորքերի դուրսբերում Հայաստանից, Բելառուսից, Վրաստանից և Մերձդնեստրից

Ուկրաինայի վերաբերյալ խաղաղության համաձայնագրի շրջանակում Եվրամիությունը մտադիր է պահանջել, որ Ռուսաստանը դուրս բերի իր զորքերը Բելառուսից, Վրաստանից, Հայաստանից և Մերձդնեստրից: Այս կետը ներառված է ԵՄ  դիվանագիտության ղեկավար Կայա Կալլասի կողմից անդամ պետությունների շրջանում տարածված քննարկման փաստաթղթում: Տեքստին ծանոթացել է «Ազատություն» ռադիոկայանը, գրում է The Moscow Times-ը։

«Եվրոպայի հիմնարար շահերը մայրցամաքում համապարփակ, արդար ու երկարատև խաղաղություն և անվտանգություն ապահովելու գործում» վերնագրով փաստաթուղթը ներկայացնում է Բրյուսելի տեսակետը Մոսկվայի կողմից կատարվելիք պայմանների վերաբերյալ:

Հարևան երկրներից զորքերի դուրսբերումից բացի՝ ԵՄ-ն պնդում է փոխհատուցման վճարման, Ուկրաինայի օկուպացված տարածքների ապառազմականացման, դրանց դե յուրե ճանաչումից հրաժարվելու և Եվրոպայի դեմ Մոսկվայի կողմից հիբրիդային հարձակումների դադարեցման հարցում։

Առանձին բաժին է հատկացված Ռուսաստանի ներքաղաքական փոփոխություններին. Եվրամիությունը պահանջում է ազատ ընտրություններ միջազգային դիտորդությամբ, քաղբանտարկյալների ազատ արձակում, արտաքսված քաղաքացիների վերադարձ, «օտարերկրյա գործակալների» մասին օրենքի չեղարկում և օգնության ցուցաբերում քաղաքական գործիչներ Ալեքսեյ Նավալնիի և Բորիս Նեմցովի սպանությունների հետաքննությանը։

Բրյուսելն ընդգծում է, որ մայրցամաքային անվտանգությունն անհնար է առանց բանակցություններին ԵՄ-ի մասնակցության: Այս առումով քննարկվում է Ռուսաստանի հետ հարաբերությունների հարցերով ԵՄ հատուկ ներկայացուցչի պաշտոնի ստեղծումը։

Առաջարկություններից մի քանիսը, ինչպես սպասվում է, ԵՄ արտաքին գործերի նախարարների քննարկմանը կներկայացվի փետրվարի 23-ին: Այնուամենայնիվ, դիվանագետները նշում են, որ Մոսկվան մինչ այժմ մերժել է հնարավոր գործարքի առանցքային  կետերը, այդ թվում՝ փոխհատուցման վճարումները և արևմտյան Ուկրաինայում օտարերկրյա ուժերի տեղակայումը:

Թարգմանությունը՝ Էմմա Չոբանյանի