Էրդողանը հայտարարել է, որ Անկարան դեմ է Իրանում ռազմական միջամտությանը

Թուրքիայի նախագահ Ռեջեփ Թայիփ Էրդողանը հայտարարել է, որ Անկարան դեմ է Իրանում ռազմական միջամտությանը և այս դիրքորոշումը հայտնել է բոլոր կողմերին՝ զգուշացնելով, որ Թեհրանի դեմ նոր պատերազմը ոչ մեկին օգուտ չի բերի։

«Իրանի դեմ նոր պատերազմը ոչ մեկին օգուտ չի բերի, ընդհակառակը, մեր տարածաշրջանը կպարտվի»,- լրագրողներին ասել է Էրդողանը Եթովպիա կատարած աշխատանքային այցից վերադառնալիս։

«Մենք մեր բոլոր գործընկերներին փոխանցել ենք, որ դեմ ենք Իրանի դեմ ռազմական միջամտությանը: Մենք շարունակելու ենք բացատրել, որ նման ռազմական էսկալացիան և լարվածության աճը մեր տարածաշրջանը կտանի ավելի մեծ անորոշություն»,- հավելել է նա։

Թուրքիայի նախագահը նաև ասել է, որ ամենաբարձր մակարդակով կապի մեջ է ինչպես Իրանի, այնպես էլ Միացյալ Նահանգների հետ՝ երկու երկրների միջև լարվածության հարցով։

«Ես վերջերս խոսել եմ Իրանի նախագահի հետ: Հաջորդ օրը ես նաև զրույց ունեցա ԱՄՆ նախագահ Թրամփի հետ: Այս բոլոր զրույցների ընթացքում մենք քննարկել ենք, թե ինչպես կարող ենք գտնել առաջընթացի ճանապարհ։ Քանի դեռ դիվանագիտության դուռը բաց է, հույս կա: Մենք կպահպանենք և կամրապնդենք այս հույսը»,- նշել է նա։

Անդրադառնալով Գազայի Խաղաղության խորհրդին՝ Էրդողանը հայտնել է, որ Թուրքիան կմասնակցի նորաստեղծ խորհրդի առաջին նիստին, երկիրը կներկայացնի արտգործնախարար Հաքան Ֆիդանը, քանի որ հավաքը համընկնում է Ռամադանի առաջին օրվա հետ։

«Իմ կարծիքով՝ Գազայի հարցը մարդկության խղճի փորձությունն է։ Մենք առաջին օրվանից հստակ ցույց ենք տվել, թե որտեղ ենք գտնվում այս փորձության մեջ։ Գազայի մեր պաղեստինցի եղբայրների և քույրերի տառապանքները պետք է դադարեցվեն հիմա։ Նպատակը պետք է լինի հրադադարը մշտական ​​դարձնելը, Գազային մարդասիրական օգնությունը առանց ընդհատումների հասցնելը և երկու պետությունների լուծման հիմքերի ամրապնդումը։ Հուսով եմ, որ Գազայի Խաղաղության խորհուրդը կնպաստի երկար սպասված կայունությանը, հրադադարին և, ի վերջո, Գազայում խաղաղությանը»,- հայտարարել է Թուրքիայի նախագահը։

Թարգմանությունը՝ Էմմա Չոբանյանի