Հրադադարի մեխանիզմը գրեթե համաձայնեցված է, բայց քաղաքական հարցերում «առաջընթաց չի եղել». Զելենսկի

Ուկրաինայի նախագահ Վլադիմիր Զելենսկին լրագրողներին ասել է, որ Ժնևում եռակողմ բանակցություններից հետո կողմերը գործնականում համաձայնության են եկել հրադադարի տեխնիկական ասպեկտների շուրջ, սակայն դա պահանջում է քաղաքական որոշումներ, որոնք դեռևս չեն կայացվել, գրում է BBC-ի ռուսական ծառայությունը։

Զելենսկին բացատրել է, որ Ռուսաստանի, ԱՄՆ-ի և Ուկրաինայի պատվիրակությունների մասնակցությամբ բանակցությունները կենտրոնացել են երկու հիմնական ուղղություններով՝ քաղաքական և ռազմական։

«Երեք կողմերն էլ կառուցողական էին իրենց ռազմական ջանքերում: Ըստ էության, զինվորականները հասկանում են՝ ինչպես վերահսկել հրադադարը և դադարեցնել պատերազմը, եթե կա քաղաքական կամք։ Նրանք հիմնականում համաձայնության են եկել գրեթե ամեն ինչի շուրջ»,- ասել է Զելենսկին։

Ուկրաինայի նախագահը հավելել է, որ հրադադարի մոնիթորինգն «անպայման կներառի ամերիկյան կողմի մասնակցությունը»։

Զելենսկին ասել է, որ քաղաքական բաղադրիչը ներառում է Ռուսաստանի և Ուկրաինայի միջև ամենավիճելի հարցերը, այդ թվում՝ Դոնբասի ճակատագիրը (Ռուսաստանը պնդում է ուկրաինական զորքերի դուրսբերման հարցում) և Զապորոժեի ատոմակայանը (ներկայում օկուպացված է ռուսների կողմից)։

«Մենք տեսնում ենք, որ կան մշակումներ։ Դիրքորոշումները դեռևս տարբերվում են, քանի որ բանակցությունները դժվար էին։ Ես լսել եմ ռազմական ուղղությամբ առաջընթացի մասին։ Քաղաքական ուղղությամբ երկխոսություն է եղել, մենք համաձայնվել ենք առաջ շարժվել, մենք համաձայնվել ենք շարունակել։ Ես այնտեղ նույն առաջընթացը չեմ լսել, ինչ ռազմական ճակատում»,- հայտարարել է Զելենսկին։