Ռուբեն Վարդանյանի միջազգային փաստաբանը Թրամփին կոչ է արել կատարել հայ գերիներին ազատելու հրապարակային խոստումը

Բաքվի զինվորական դատարանի կողմից կեղծ մեղադրանքներով Ռուբեն Վարդանյանին 20 տարվա ազատազրկման դատապարտելը պարզապես արդարադատության նկատմամբ ծաղր է: Հարգված գործարար և բարերար Ռուբենի միակ «հանցանքը» Լեռնային Ղարաբաղի հայ քրիստոնյա ժողովրդի ինքնորոշման իրավունքի համար պայքարն էր, որոնցից մոտ 120,000-ը զոհ է դարձել Ադրբեջանի նախագահ Իլհամ Ալիևի էթնիկ զտման արշավին, որը նրանց այդ տարածաշրջանից վտարեց դեպի Հայաստան: Այս մասին ասվում է Արցախի նախկին պետնախարար Ռուբեն Վարդանյանի փաստաբան, միջազգային խորհրդական Ջարեդ Գենսերի հայտարարության մեջ։

«Դատավարությունն ինքնին լիակատար ֆարս էր, քանի որ քաղաքացիական անձանց համար անօրինական է երբևէ դատվել ռազմական դատարանի առջև: Այն նաև անցկացվել է գաղտնի, անթիվ այլ դատավարական չարաշահումներով, ինչպիսիք են փաստաբանի հետ կապի բազմաթիվ մերժումները և դատարանի կողմից ներկայացված տասնյակ միջնորդությունների անտեսումը, որոնք, ըստ ադրբեջանական օրենսդրության, պետք է լուծվեին դրանց ներկայացումից հետո մի քանի օրվա ընթացքում: Բացի այդ, դատարան ներկայացված «վկաների» բառացիորեն բոլոր, այսպես կոչված, «ապացույցներն» անօրինական էին, քանի որ դրանք անընդունելի երկրորդ ձեռքի ցուցմունքներ էին: Բոլոր վկաները պնդում էին, որ իրենք կամ իրենց ընտանիքի անդամները վիրավորվել են հայկական ուժերի կամ այլ զինված խմբավորումների հարձակումներից, սակայն այդ հարձակումներին Ռուբենի ներգրավվածության կամ դրանց համար պատասխանատու լինելու բոլոր ապացույցները բխում էին ադրբեջանական պետական ​​լրատվամիջոցներից լսածներից։ Սա ոչնչի ապացույց չէ։ Հետևաբար, Ռուբենի դատապարտումը և դատավճիռը խախտում են ինչպես միջազգային, այնպես էլ ադրբեջանական օրենքները, և բոլոր 19 հայ քրիստոնյա քաղբանտարկյալներն ու ռազմագերիները պետք է անհապաղ ու անվերապահորեն ազատ արձակվեն»,- ասվում է հայտարարության մեջ։

Գենսերը կոչ է արել ԱՄՆ նախագահ Դոնալդ Թրամփին՝ կատարել իր հրապարակային խոստումը, որը տվել է ՀՀ վարչապետ Նիկոլ Փաշինյանին՝ ապահովելու հայ գերիների ազատ արձակումը, որպեսզի նրանք կարողանան անվտանգ վերադառնալ Հայաստան։

Թարգմանությունը՝ Էմմա Չոբանյանի