10.06.2026 | 12:43
Բելֆաստում ներգաղթյալների դեմ բողոքի ցույցեր են բռնկվել․ հրդեհվել են մեքենաներ և տներ․ ՏԵՍԱՆՅՈՒԹ
ՄԱԿ-ի ավելի քան 80 անդամ երկրներ դատապարտել են Իսրայելի՝ Արևմտյան ափին ընդլայնվելու ծրագրերը
Քաղաքականություն
18.02.2026 | 15:55
ՄԱԿ-ի անդամ 85 պետությունների առաքելությունները համատեղ հայտարարություն են տարածել՝ դատապարտելով Իսրայելի կողմից Արևմտյան ափի նկատմամբ վերահսկողության ընդլայնումը, որը, քննադատների կարծիքով, հավասարազոր է պաղեստինյան տարածքի փաստացի բռնակցման, գրում է France 24-ը։
«Մենք խստորեն դատապարտում ենք իսրայելական միակողմանի որոշումներն ու միջոցառումները, որոնք ուղղված են Իսրայելի անօրինական ներկայությունն Արևմտյան ափին ընդլայնելուն։ Նման որոշումները հակասում են Իսրայելի միջազգային պարտավորություններին և պետք է անհապաղ չեղյալ հայտարարվեն։ Այս առումով մենք ընդգծում ենք մեր կտրականապես դեմ լինելը ցանկացած տեսակի բռնակցման»,- ասվում է հայտարարությունում։
Անցյալ շաբաթ Իսրայելի անվտանգության կաբինետը հաստատել էր մի շարք միջոցառումներ, որոնք աջակցվում են ծայրահեղ աջ նախարարների կողմից՝ 1990-ականներից ի վեր գործող Օսլոյի համաձայնագրերի համաձայն խստացնելու Արևմտյան ափի այն տարածքների նկատմամբ վերահսկողությունը, որոնք կառավարվում են Պաղեստինի ինքնավարության կողմից։ Կիրակի Իսրայելի կառավարությունը հաստատել է նաև Արևմտյան ափին գտնվող հողերը որպես «պետական սեփականություն» գրանցելու գործընթացը, ինչն արժանացել է միջազգային քննադատության։
«Մենք կրկին մերժում ենք 1967 թվականից ի վեր օկուպացված Պաղեստինյան տարածքի, այդ թվում՝ Արևելյան Երուսաղեմի ժողովրդագրական կազմը, բնույթը և կարգավիճակը փոխելուն ուղղված բոլոր միջոցառումները»,- ասվում է ՄԱԿ-ի պետությունների համատեղ հայտարարության մեջ։
Նշվում է, որ նման միջոցառումները խախտում են միջազգային իրավունքը, խաթարում տարածաշրջանում խաղաղության և կայունության համար շարունակվող ջանքերը, հակասում են Համապարփակ ծրագրին և վտանգում են հակամարտությունը վերջ դնելու համար խաղաղության համաձայնագրի հասնելու հեռանկարին։
Հայտարարությունը հրապարակվել է 85 անդամ երկրների, այդ թվում՝ Սաուդյան Արաբիայի, Չինաստանի և Ռուսաստանի, ինչպես նաև Եվրամիության, Արաբական պետությունների լիգայի և Իսլամական համագործակցության կազմակերպության անունից։
ՄԱԿ-ի գլխավոր քարտուղար Անտոնիո Գուտերեշը երկուշաբթի կոչ էր արել Իսրայելին վերանայել հողերի գրանցման իր քաղաքականությունը՝ այն անվանելով «անկայունացնող» և «անօրինական»։
Իսրայելի կողմից բռնակցված Արևելյան Երուսաղեմից բացի՝ ավելի քան 500,000 իսրայելցիներ են ապրում Արևմտյան ափի բնակավայրերում և դիրքերում, որոնք, միջազգային իրավունքի համաձայն, անօրինական են։
Շուրջ երեք միլիոն պաղեստինցիներ ապրում են այն տարածքում, որը 1967 թվականից Իսրայելն օկուպացրել է։
Թարգմանությունը՝ Էմմա Չոբանյանի
