02.07.2026 | 18:32
Արտահանումը խթանող գործակալություն կստեղծենք. Փաշինյան․ ՏԵՍԱՆՅՈՒԹ
Զելենսկին պատժամիջոցներ է սահմանել Լուկաշենկոյի նկատմամբ
Քաղաքականություն
18.02.2026 | 12:52
Ուկրաինան պատժամիջոցներ է սահմանել Բելառուսի նախագահ Ալեքսանդր Լուկաշենկոյի նկատմամբ։ Այս մասին սոցիալական ցանցերում հայտնել է Ուկրաինայի նախագահ Վլադիմիր Զելենսկին, գրում է УНН-ը։
«Այսօր Ուկրաինան պատժամիջոցների փաթեթ է սահմանել Ալեքսանդր Լուկաշենկոյի նկատմամբ, և մենք զգալիորեն կակտիվացնենք մեր ջանքերը՝ ուկրաինացիների սպանության գործում նրա ցանկացած օգնությանը հակազդելու համար։ Մենք կաշխատենք մեր գործընկերների հետ՝ ապահովելու, որ սա գլոբալ ազդեցություն ունենա»,- ասել է նա։
Ըստ Զելենսկիի՝ «2025 թվականի երկրորդ կեսին ռուսները Բելառուսի տարածքում տեղակայել են հարձակողական անօդաչու թռչող սարքերի կառավարման համակարգ, ինչը մեծացրել է ռուսական բանակի կարողությունը՝ հարվածելու հյուսիսային շրջաններին՝ Կիևից մինչև Վոլին»։
«Ռուսներն առանց Բելառուսի օգնության չէին կարողանա իրականացնել որոշ հարվածներ, մասնավորապես, մեր շրջանների էներգետիկ օբյեկտների և երկաթուղիների վրա։ 3000-ից ավելի բելառուսական ձեռնարկություններ սպասարկում են Ռուսաստանի ռազմական ջանքերը՝ մատակարարելով սարքավորումներ ու մասեր, որոնք դասակարգված են որպես կրիտիկական կարևոր։ Դրանց թվում են մեր քաղաքներն ու գյուղերն ահաբեկող հրթիռների արտադրության բաղադրիչները»,- ասել է Զելենսկին։
Նա նշել է, որ Բելառուսի տարածքում «Օրեշնիկ» միջին հեռահարության հրթիռների տեղակայման ենթակառուցվածքների զարգացումը նույնպես շարունակվում է, ինչն ակնհայտ սպառնալիք է ոչ միայն ուկրաինացիների, այլև բոլոր եվրոպացիների համար։
«Ալեքսանդր Լուկաշենկոն ոչ միայն Բելառուսի տարածքն է տրամադրել «Օրեշնիկի» համար։ Անցյալ տարի երկրի ձեռնարկությունները Ռուսաստան են մատակարարել կարևոր բաղադրիչներ, ինչպես նաև այս զենքի մեխանիկական բազա։ Սա շարունակվում է նաև 2026 թվականին։ Ալեքսանդր Լուկաշենկոն վաղուց է Բելառուսի ինքնիշխանությունը փոխանակում անձնական իշխանության շարունակման հետ, օգնում է ռուսներին շրջանցել այս ագրեսիայի համար միջազգային պատժամիջոցները, ակտիվորեն արդարացնում է ռուսական պատերազմը, իսկ այժմ մեծացնում է իր սեփական մասնակցությունը պատերազմի ընդլայնման և երկարաձգման գործում։ Դրա համար կլինեն հատուկ հետևանքներ»,- հայտարարել է Ուկրաինայի նախագահը։
Թարգմանությունը՝ Էմմա Չոբանյանի
