Քաղաքականություն
16.02.2026 | 20:27
«Վագներ» մասնավոր ռազմական կազմակերպության նախկին հավաքագրողներն ու քարոզիչները դարձել են Կրեմլի կողմից կազմակերպված գործողությունների հիմնական խողովակը: Financial Times-ը գրում է, որ արևմտյան հետախուզական ծառայությունների տվյալներով՝ խումբը դիվերսիոն գործողություններ է իրականացնում Եվրոպայում, փոխանացում է BBC-ի ռուսական ծառայությունը։
Մինչդեռ, «Վագներ»-ը մի քանի տարի առաջ հայտարարել էր գործունեության դադարեցման մասին: Նշվում է, որ Եվգենի Պրիգոժինի 2023 թվականի հունիսին ձախողված հեղաշրջումից և նրա մահից հետո «այս զինված խմբի կարգավիճակը մնացել է անորոշ»։ Ըստ FT-ի աղբյուրների, «Վագներ»-ի հավաքագրողները, որոնք «մասնագիտանում էին Ռուսաստանի շրջաններից երիտասարդ տղամարդկանց համոզելու մեջ՝ կռվելու Ուկրաինայում», հիմա նոր առաքելություն ունեն՝ հավաքագրել տնտեսապես խոցելի եվրոպացիների՝ ՆԱՏՕ-ի երկրների տարածքում հարձակումներ իրականացնելու համար:
Ռուսական գլխավոր հետախուզական վարչությունն «օգտագործում է իր տրամադրության տակ գտնվող տաղանդներին», ասել է արևմտյան հետախուզության աշխատակիցը՝ հղում անելով «Վագներ»-ի ցանցին: Հրապարակման համաձայն՝ Ռուսաստանի ռազմական հետախուզությունը և ԱԴԾ հակահետախուզական գործակալությունը գնալով ավելի ակտիվ են դառնում Եվրոպայում գործակալների որոնման գործում՝ ձգտելով «քաոս սերմանել»:
Վերջին երկու տարիների ընթացքում Կրեմլն ընդլայնել է իր անկայունացման և դիվերսիայի արշավն ամբողջ Եվրոպայում՝ նպատակ ունենալով թուլացնել արևմտյան տերությունների վճռականությունն Ուկրաինային աջակցելու և սոցիալական անկարգություններ հրահրելու հարցում։
FT-ն նշում է, որ ԵՄ մայրաքաղաքներից մի շարք դիվանագիտական արտաքսումներից հետո Եվրոպայում գաղտնի գործակալների թվի զգալիորեն նվազման հետ բախվելով՝ հետախուզության ղեկավարներն ավելի ու ավելի հաճախ են դիմում միջնորդների՝ իրենց առաջադրանքը կատարելու համար: Եվ «Վագներ»-ի ցանցն ապացուցել է առանձնապես արդյունավետ, թեև պարզունակ գործիք լինելը։
FT-ի աղբյուրները նշում են, որ «Վագներ»-ի գործակալներին հանձնարարվել է կատարել բազմազան առաջադրանքներ՝ սկսած քաղաքական գործիչների մեքենաների և Ուկրաինայի համար մարդասիրական օգնություն պարունակող պահեստների հրկիզումից մինչև նացիստական քարոզիչների դերում ներկայանալը: Հավաքագրումը սովորաբար վճարովի է և հաճախ ներառում է մարգինալացված անհատների:
Եվրոպացի պաշտոնյաներից մեկն ասել է, որ «Վագներ»-ն ունի հավաքագրողների պատրաստի ցանց, որոնք «խոսում են նրանց լեզվով»:
Թարգմանությունը՝ Էմմա Չոբանյանի
