Պեսկովը հայտնել է, որ տարածքների հարցը կքննարկվի Ժնևում Ուկրաինայի վերաբերյալ բանակցություններում

Ժնևում Ուկրաինայի վերաբերյալ բանակցություններում քննարկվող թեմաների շրջանակն ավելի լայն կլինի, քան Աբու Դաբիում նախորդ խորհրդակցությունների ժամանակ, ուստի ռուսական պատվիրակությունը կընդլայնվի և կգլխավորի Ռուսաստանի նախագահի օգնական Վլադիմիր Մեդինսկին, հայտարարել է Կրեմլի խոսնսակ Դմիտրի Պեսկովը, գրում է Ինտերֆաքսը։

«Եկեք հիշենք Պուտինի՝ բազմիցս արված հայտարարությունն այն մասին, որ Մեդինսկին ռուսական բանակցային պատվիրակության ղեկավարն է։ Պուտինն այս հայտարարությունն արել է Աբու Դաբիում առաջին փուլից առաջ, ընթացքում և այլն։ Մեդինսկին մնացել է մեր բանակցային պատվիրակության ղեկավարը»,- ասել է Պեսկովը՝ մեկնաբանելով Ժնևում կայացած բանակցություններում ռուսական պատվիրակության կազմի փոփոխությունը և Մեդինսկիի վերադարձը որպես պատվիրակության ղեկավար։

Նրա խոսքով՝ Մեդինսկին ներկա չի եղել Աբու Դաբիում կայացած խորհրդակցություններին, «քանի որ քննարկումները կենտրոնացած էին անվտանգության, ռազմական ոլորտին անմիջականորեն վերաբերող հարցերի վրա, այդ պատճառով ռուսաական խումբը այնտեղ գլխավորում էր Կոստյուկովը (ՌԴ զինված ուժերի գլխավոր շտաբի գլխավոր վարչության պետ Իգոր Կոստյուկով ), և այն բաղկացած էր զինվորականներից»։

«Այս անգամ մենք մտադիր ենք քննարկել հարցերի ավելի լայն շրջանակ, այդ թվում՝ գլխավոր հարցերը, որոնք վերաբերվում են տարածքներին և մեր ունեցած պահանջների հետ կապված մնացած ամեն ինչին։ Գլխավոր բանակցող Մեդինսկիի ներկայությունն այժմ անհրաժեշտ է»,- հավելել է Պեսկովը։

Նա հավելել է, որ «պատվիրակությունն այս անգամ ընդլայնված կլինի։ Մեդինսկիից բացի՝ կլինեն Գալուզինը (Ռուսաստանի արտաքին գործերի փոխնախարար Միխայիլ Գալուզինը) և ուրիշները»։ Պեսկովը նաև դրական է պատասխանել պատվիրակության կազմում Կոստյուկովի ներգրավման մասին հարցին։

Ուկրաինայի վերաբերյալ բանակցությունների նախորդ փուլը տեղի էր ունեցել Աբու Դաբիում փետրվարի 4-5-ը։

Թարգմանությունը՝ Էմմա Չոբանյանի