Մշակույթը տմբլըտաշ երգ ու պարը չի, դրանից սկսվում է վերելքն ու խաղաղությունը. Հայկ Պետրոսյան. ՏԵՍԱՆՅՈՒԹ

«Երբ խաղում էի «Ամեն ինչ լայվա լինելու» ներկայացումը, չէի պատկերացնի, որ կգան օրեր, երբ Արարատը կդառնա թիրախ, քաղաքական խնդիր, սակայն Արարատի հետ կապված իմ երազանքը, որի մասին խոսում եմ ներկայացման մեջ, ժամանակավրեպ չէ ինձ համար»,- Factor TV-ի հետ զրույցում նշում է երգիչ, դերասան Հայկ Պետրոսյանը:

Մեր զրուցակիցը որպես կամավոր մասնակցել է 44-օրյա պատերազմին, ուստի հարցրեցինք՝ խաղաղությունը, որին ինքը ձգտել է, և այն խաղաղությունը, որի հաստատման մասին այսօր ազդարարում է իշխանությունը, որքանով են համապատասխանում միմյանց. «Ես եղել եմ խրամատում, ճանաչում եմ հերոս տղաների, որոնք ինձնից լավ գիտեն խաղաղության գինը: Ինձ թվում է՝ լավ կլինի՝ սկսենք նրանից, որ գնահատենք այն, ինչ ունենք: Պետք է բոլորով «կպնենք» ու գործ անենք, կարճ ժամանակում աշխատանք տանենք՝ ֆիզիկականից ինտելեկտուալ: Խաղաղությունը, բացի քաղաքական պարտադրանքից, ամեն մարդու ներքին ճանապարհն է, նա իր փոքրիկ աշխարհում պետք է խաղաղ լինի: Մեզ կարող է օգնել մշակույթը, օրինակ՝ երգարվեստը չքնաղ դեղամիջոց է»:

Հայկ Պետրոսյանը շեշտում է՝ այսօր՝ օրինակ՝ Կոմիտասը, ցավոք, անծանոթ է մեզանից շատերին, մինչդեռ մեր ժողովուրդը, նրա խոսքով, պետք է գիտակցի՝ ինչ մշակույթ ունի. «Մշակույթը տմբլըտաշ երգ ու պարը չէ, դրանից է սկսվում վերելքն ու խաղաղությունը, իրար հետ երգելը կուռ, ամուր ոգի է ստեղծում: Ամեն հայ պետք է գիտակցված հարաբերվի իր մշակույթին»:

Մանրամասները՝ տեսանյութում:

Աննա Բաբաջանյան