02.07.2026 | 15:47
ՌԴ-ու եմ ապրել ու աշխատել․ իմ նմաններին արգելելու եք ընտրել․ Աղազարյան․ ՏԵՍԱՆՅՈՒԹ
ԱՄՆ-ը գաղտնի կերպով հազարավոր Starlink տերմինալներ է ուղարկել Իրան՝ բողոքի ցույցերի բռնի ճնշումից և ինտերնետի անջատումից հետո. WSJ
Քաղաքականություն
13.02.2026 | 17:17
ԱՄՆ նախագահ Դոնալդ Թրամփի վարչակազմը գաղտնի կերպով հազարավոր Starlink տերմինալներ է ուղարկել Իրան՝ երկրի կողմից հունվարին կառավարության դեմ խոշոր բողոքի ցույցերի դաժան ճնշումից հետո։ Այս մասին հայտնում է The Wall Street Journal-ը՝ հղում անելով ԱՄՆ պաշտոնյաներին, փոխանցում է Current time-ը։
Starlink-երն ուղարկելով՝ Սպիտակ տունը փորձել է ապահովել ցուցարարների հասանելիությունն ինտերնետին այն բանից հետո, երբ Թեհրանը սահմանափակել է այն։
Հունվարին Իրանում բողոքի ցույցերը ճնշելուց, հազարավոր ակտիվիստների սպանությունից և ինտերնետի կտրուկ անջատումից հետո, ըստ մարդու իրավունքների պաշտպանների, Միացյալ Նահանգները մաքսանենգ ճանապարհով շուրջ 6,000 արբանյակային ինտերնետային հավաքածու է ներմուծել, որը Starlink համակարգի առաջին ուղղակի առաքումն է եղել Իրան։
WSJ-ի աղբյուրների համաձայն՝ Պետքարտուղարությունը վերջին ամիսներին գնել է շուրջ 7,000 Starlink տերմինալ, որոնց մեծ մասը ձեռք է բերվել հունվարին՝ Իրանում ակտիվիստներին շրջափակումները շրջանցելու հարցում օգնելու համար: Աղբյուրները նշել են, որ նախագահ Թրամփը տեղյակ է եղել գնումների մասին, բայց հայտնի չէ՝ արդյո՞ք նա անմիջականորեն հաստատել է այդ ծրագիրը:
Թեհրանը բազմիցս, առանց ապացույցների, մեղադրել է Վաշինգտոնին 90 միլիոն բնակչություն ունեցող երկրում դժգոհություն հրահրելու և վերջին համազգային ցույցերը կազմակերպելու մեջ։
Երկրում բողոքի ցույցերը սկսվել են 2025 թվականի դեկտեմբերի 28-ին և տարածվել են Իրանի բոլոր նահանգներում: Սկզբում ցուցարարները բարձրաձայնում էին տնտեսական ճգնաժամի, գնաճի աճի և ազգային արժույթի թուլացման հետ կապված պահանջներ: Սակայն ավելի ուշ սկսեցին աճել կառավարության դեմ կարգախոսները և միապետության վերականգնման կոչերը: Մինչև ինտերնետի անջատումը բողոքի ցույցերը տարածվել էին մոտ 120 քաղաքներում: Իշխանությունները փորձում են ուժով ճնշել ցույցերը: Մարդու իրավունքների պաշտպանների տվյալներով՝ բռնաճնշումների ընթացքում զոհվել է առնվազն 5848 մարդ, 7804-ը՝ ծանր վիրավորվել, իսկ ավելի քան 41,000-ը ձերբակալվել է:
Թրամփը սպառնում էր հարվածել Իրանին, եթե երկրի իշխանությունները սկսեն մահապատժի ենթարկել բողոքի ցույցերի ժամանակ ձերբակալված ակտիվիստներին։
Թարգմանությունը՝ Էմմա Չոբանյանի
