24.08.2026 | 23:26
Ծանրորդ Տիգրան Ավետիսյանը՝ Եվրոպայի Մ15 տարեկանների չեմպիոն
Հայտնի են Հակոբ Հակոբյանի լիազորությունների դադարեցման հարցով քվեարկության արդյունքները
Քաղաքականություն
13.02.2026 | 11:15
ՀՌՀ անդամ Հակոբ Հակոբյանի լիազորությունները չեն դադարեցվի։ 107 պատգամավորներից քվեարկությանը մասնակցել է 28-ը, որոնք կողմ են եղել լիազորությունների դադարեցմանը։
«Քաղաքացիական պայմանագիր» խմբակցության ղեկավար Հայկ Կոնջորյանն ավելի վաղ հայտնել էր, որ քվեարկությանը չեն մասնակցելու։
Հիշեցնենք՝ նախագիծը հեղինակել է «Հայաստան» խմբակցությունը։ Ընդդիմադիրները պնդում են՝ Հակոբ Հակոբյանը, լինելով Հեռուստատեսության և ռադիոյի հանձնաժողովի անդամ, «1-in.am» լրատվական կայքին տված հարցազրույցում քաղաքական գնահատականներ է հնչեցրել Հայ Յեղափոխական Դաշնակցություն կուսակցության հասցեին, և այդ գնահատականներն ուղեկցվել են ատելության քարոզով:
Ըստ որոշման նախագծի հիմնավորման՝ ՀՀ Սահմանադրության 197-րդ հոդվածի 5-րդ եւ 6-րդ մասերը վկայում են Հեռուստատեսության և ռադիոյի հանձնաժողովի անդամներն իրենց լիազորությունների իրականացման ժամանակահատվածում չեն կարող լինել որևէ կուսակցության անդամ կամ որևէ այլ կերպ զբաղվել քաղաքական գործունեությամբ: Հրապարակային ելույթներում նրանք պետք է ցուցաբերեն քաղաքական զսպվածություն: Սույն հոդվածի 4-րդ և 5-րդ մասերի պայմաններից որևէ մեկը խախտելու դեպքում Հեռուստատեսության և ռադիոյի հանձնաժողովի անդամի լիազորությունները դադարեցնում է Ազգային ժողովը՝ պատգամավորների ընդհանուր թվի ձայների առնվազն երեք հինգերորդով:
Կոռուպցիայի կանխարգելման հանձնաժողովի նախագահի պարտականությունները կատարող Մարիամ Գալստյանը հարակից զեկույցում ներկայացրել է ԿԿՀ եզրակացությունը: ԿԿՀ-ն քննարկել է 2025 թվականի փետրվարի 13-ի հարցազրույցի ընթացքում Հակոբ Հակոբյանի խոսքի մի քանի հատված, սակայն խախտում արձանագրել է դրանցից միայն մեկով: Հանձնաժողովն արձանագրել է, որ Հակոբ Հակոբյանի խոսքն այնքանով, որքանով պարունակում է քաղաքական կուսակցության ներկա գործունեության և գաղափարախոսության քննադատություն, հանգեցրել է վարքագծի կանոնագրքի 64-րդ կետի խախտման:
Հեռուստատեսության և ռադիոյի հանձնաժողովի անդամ Հակոբ Հակոբյանն ընդգծել է, որ ինքը հակադաշնակցական չէ, երբեք չի եղել ու հավելել, որ Դաշնակցության մասին խոսել է պատմական կտրվածքով: Հակոբ Հակոբյանը՝ որպես նաև մտավորական, ներկայացրել է իր դիրքորոշումը և խոսել պատմական, քաղաքական տարբեր իրողությունների մասին:
