27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
ՆԱՏՕ-ի դաշնակիցներն Ուկրաինային 35 միլիարդ դոլարի ռազմական օգնություն կտրամադրեն
Քաղաքականություն
13.02.2026 | 11:51
Գրենլանդիայի ճգնաժամից հետո ՆԱՏՕ-ի դաշնակիցներն Ուկրաինան վերադարձրել են իրենց օրակարգի առաջին պլան։ Նրանք խոստացել են 35 միլիարդ դոլարի զենք, սակայն հակահրթիռային համակարգերի լուրջ պակասը վտանգի տակ է դնում ուկրաինական քաղաքները։ Ուկրաինան Բրյուսելում երկօրյա հանդիպումների շարքի կիզակետում էր․ տեղի է ունեցել նախ ԵՄ պաշտպանության նախարարների խորհրդի, ապա ՆԱՏՕ-ի պաշտպանության նախարարների հանդիպումը։ Գրեթե բոլոր հիմնական քննարկումներն ուղղակիորեն կամ անուղղակիորեն կապված էին Կիևի՝ մարտադաշտում ունեցած կարիքների և Ուկրաինայի ապագա անվտանգության հետ, գրում է DW-ի ռուսական ծառայությունը։
Սա Ուկրաինայի նոր պաշտպանության նախարար Միխայիլ Ֆյոդորովի առաջին պաշտոնական ելույթն էր Բրյուսելում: Երկու օրերի հանդիպումների միջև ընկած ժամանակահատվածում նա մի քանի երկկողմ հանդիպումներ է ունեցել իր եվրոպացի գործընկերների հետ, բայց մամուլի առջև հայտնվել է միայն մեկ անգամ՝ ՆԱՏՕ-ի կենտրոնակայանում՝ Ռամշտայնի նիստից հետո։
Ասուլիսին մասնակցած ՆԱՏՕ-ի գլխավոր քարտուղար Մարկ Ռյուտեն գովաբանել է Ֆյոդորովին որպես պաշտպանության ոլորտում «տեխնոլոգիական հեղափոխության» առաջնորդ, որն իր թիմի հետ միասին գտնվում է «ռազմական նորարարությունների առաջնագծում»։ Այս ձևակերպումներն ուշագրավ են, քանի որ Ռյուտեն Ուկրաինայի մասին խոսում է ոչ միայն որպես օգնության ստացող կամ նույնիսկ Եվրոպայի պաշտպան, այլև որպես Հյուսիսատլանտյան դաշինքի նորարարությունների աղբյուր, ասվում է հրապարակման մեջ։
Ֆյոդորովը ներկայացրել է 2026 թվականի համար 18 կառուցվածքային պաշտպանական նախագիծ:
«Մենք պարզապես չենք մեծացնում մասշտաբները. մենք հրավիրում ենք գործընկերներին ներդրումներ կատարել մարտական փորձության մեջ փորձարկված տեխնոլոգիաների մեջ, որոնք վերափոխում են առաջնագիծը»,- հայտարարել է նա:
Նախարարը նաև նշել է Պաշտպանության նախարարության աշխատանքի արագացմանը և արդյունավետության բարձրացմանն ուղղված բարեփոխումների մասին, խոսել «նոր պաշտպանական մոդելի» ստեղծման մասին:
«Մենք լուծումներ ենք բերում, ոչ միայն կարիքներ: Ուկրաինան ՆԱՏՕ-ին առաջարկում է իրական ժամանակի տվյալներ և եզակի պաշտպանական փորձագիտություն»,- ընդգծում է Ֆյոդորովը։
Նա նույնիսկ Ռուսաստանի համար պատերազմի գինը վերածել է վիճակագրության ներկայացման՝ ամսական 35,000 հաստատված զոհ և վիրավոր, և նպատակն է այս թիվը հասցնել ամսական 50,000-ի։
ՆԱՏՕ-ի տվյալներով՝ Մոսկվան 2025 թվականին արձակել է մոտ 55,000 հարվածային անօդաչու թռչող սարք՝ մոտավորապես հինգ անգամ ավելի, քան նախորդ տարի: Միևնույն ժամանակ, Ուկրաինայի թիկունքում բալիստիկ և թևավոր հրթիռների, ինչպես նաև հեռահար անօդաչու թռչող սարքերի կիրառմամբ ավիահարվածների թիվը կրկնապատկվել է։
Ռուսաստանը շարունակում է հարվածել քաղաքացիական էներգետիկ օբյեկտներին՝ «առանց ռազմական նշանակության», Բրյուսելում կայացած ճեպազրույցի ժամանակ նշել է ՆԱՏՕ-ի բարձրաստիճան պաշտոնյան։ ՆԱՏՕ-ն ընդգծում է, որ ռուսական արշավի նպատակն է բնակչությանը զրկել էլեկտրաէներգիայից և ջեռուցումից, ինչպես նաև հարվածներ հասցնել տրանսպորտային և բնակելի տարածքներին։ Ուկրաինան գործնականում ապրում է օդային պաշտպանության արտակարգ իրավիճակ. սա Բրյուսելում այս երկու օրերի ամենաակնհայտ գործառնական ազդանշանն էր։
ԱՄՆ ռազմական գնումների մեխանիզմի (PURL) շրջանակում դաշնակիցները, այդ թվում՝ Նիդերլանդները, Մեծ Բրիտանիան, Նորվեգիան և Շվեդիան, հայտարարել են հարյուր միլիոնավոր եվրոյի ֆինանսավորման մասին՝ Ուկրաինայի համար հակաօդային պաշտպանության համակարգերի, հրթիռների և այլ առաջնահերթ զենքերի գնման նպատակով: Միաժամանակ, բոլոր մակարդակներում հստակորեն ընդունվել է, որ Patriot համակարգերի համար նախատեսված PAC-3 որսման համակարգերը շարունակում են մնալ խոչընդոտ:
Ֆյոդորովը բացահայտ խոսել է այս սարքերի՝ բալիստիկ թիրախները խափանելու ունակ միակ հրթիռների կրիտիկական պակասի մասին։
«PAC-3-ը բալիստիկ հրթիռների դեմ միակ հուսալի վահանն է»,- ընդգծել է նախարարը մամուլի ասուլիսում՝ կոչ անելով գործընկերներին շտապ փոխանցել լրացուցիչ հրթիռներ իրենց պաշարներից։
Գերմանիայի ՊՆ ղեկավար Բորիս Պիստորիուսը Ռամշտայնի հանդիպման ժամանակ անսովոր քայլ է կատարել։
«Հանդիպման ավարտին ես ինքնաբերաբար առաջարկեցի, որ Գերմանիան Ուկրաինային կմատակարարի ևս հինգ PAC-3, եթե մյուս դաշնակից երկրները նվիրաբերեն, ընդհանուր առմամբ, 30 PAC-3։ Բոլորս գիտենք, որ խոսքը կյանքեր փրկելու մասին է։ Դա օրերի հարց է, այլ ոչ թե շաբաթների կամ ամիսների»,- ասել է նա։
ՆԱՏՕ-ի գլխավոր քարտուղար Մարկ Ռյուտեն բազմիցս ընդգծել է, որ Ուկրաինան «անհապաղ պետք է ամրապնդի իր օդային պաշտպանությունը»։ Նա վստահեցրել է, որ Կիևին կարևորագույն զենքի և ֆինանսավորման հոսքը չի կրճատվի՝ հավելելով. «Վստահեք ինձ, որ դա կանեմ», և կոչ է արել դաշնակիցներին ավելի ակտիվորեն մասնակցել բացերի լրացմանը։
Կոնտակտային խմբի նիստից հետո դաշնակիցները հայտարարել են 2026 թվականին Ուկրաինային 35 միլիարդ դոլարի ռազմական օգնություն տրամադրելու պարտավորությունների մասին:
Բրյուսելում հնչել է ևս մեկ կարևոր ազդանշան՝ դաշնակիցների միասնությունը։
«Ուկրաինայի հարցով շփման խմբի անդամները ավելի միասնական և վճռական են, քան երբևէ։ Մենք հանձնառու ենք 2026 թվականը դարձնել պատերազմի ավարտի տարին»,- հայտարարել է Մեծ Բրիտանիայի պաշտպանության նախարար Ջոն Հիլին։
Ռյուտեն նույնպես շեշտել է միասնությունը՝ ներկայիս նախարարական հանդիպումն անվանելով ամենակարևորներից մեկը 2010 թվականին դաշինքի հանդիպումներին իր մասնակցությունից ի վեր։ Նա նշել է, որ «ՆԱՏՕ-ն ամուր կանգնած է Ուկրաինայի կողքին», քանի որ «նրանց անվտանգությունը փոխկապակցված է»։
Ըստ DW-ի՝ բրյուսելյան հանդիպումները ցույց են տալիս, որ Ուկրաինան շարունակում է մնալ կենտրոնական հարց ՆԱՏՕ-ի և ԵՄ անդամների համար։ Սա վերաբերում է ոչ միայն զենքի անհապաղ մատակարարումներին, այլև Եվրոպայի երկարաժամկետ անվտանգության ճարտարապետությանը։
Թարգմանությունը՝ Էմմա Չոբանյանի
