10.10.2026 | 12:14
Երևանի Կենտրոնում ազոտի երկօքսիդի պարունակությունը 4 օր գերազանցել է թույլատրելի սահմանը
Մեծ Բրիտանիան Ուկրաինային 680 միլիոն դոլար կհատկացնի հակաօդային պաշտպանության համար
Քաղաքականություն
12.02.2026 | 18:51
Մեծ Բրիտանիան Ուկրաինայի հակաօդային պաշտպանության համար կհատկացնի 500 միլիոն ֆունտ սթեռլինգ (680 միլիոն դոլար): The Insider-ի հաղորդմամբ՝ ՆԱՏՕ-ի գլխավոր քարտուղար Մարկ Ռյուտեն այս մասին հայտարարել է դաշինքի պաշտպանության նախարարների հանդիպումից առաջ։
«Ես լավ լուր ունեմ Մեծ Բրիտանիայի պաշտպանության նախարար Ջոն Հիլիից։ Նրանք 500 միլիոն ֆունտ կհատկացնեն Ուկրաինայում օդային պաշտպանության համար»,- ասել է նա։
Նախորդ օրը ՆԱՏՕ-ի բարձրաստիճան պաշտոնյան հայտարարել էր, որ Ռուսաստանը վերջին մեկ տարվա ընթացքում ավելացրել է Ուկրաինայի կարևորագույն ենթակառուցվածքների վրա հարվածների թիվը։ ՆԱՏՕ-ն կարծում է, որ այս հարվածների նպատակն է քաղաքացիական բնակչությանը զրկել էլեկտրաէներգիայից և ջեռուցումից, ինչպես նաև բնակելի տարածքներում օգտագործվող հասարակական տրանսպորտից։
Փետրվարի 11-ին Հիլին Politico-ին ասել էր, որ Մեծ Բրիտանիան կմիանա PURL ծրագրին և սկզբնապես կհատկացնի 150 միլիոն ֆունտ սթեռլինգ (204 միլիոն դոլար):
«Միասին մենք պետք է Ուկրաինային տրամադրենք կարևորագույն օդային պաշտպանության հնարավորություններ, որոնք նրան անհրաժեշտ են Պուտինի դաժան հարձակումներից պաշտպանվելու համար»,- ասել էր Մեծ Բրիտանիայի պաշտպանության նախարարը:
Անցյալ տարի արևմտյան դաշնակիցները PURL ծրագրի միջոցով Ուկրաինայի համար հավաքագրեցին մոտ 5 միլիարդ դոլար։ Փետրվարին Ռյուտեն հայտարարել էր, որ դաշինքը կկարողանա այս տարի հավաքագրել լրացուցիչ 15 միլիարդ դոլար։ PURL ծրագրի շրջանակներում ԱՄՆ-ի հետագա զենքի գնումների մասին, ինչպես սպասվում է, կհայտարարվի փետրվարի 12-ին Բրյուսելում կայանալիք ՆԱՏՕ-ի պաշտպանության նախարարների հանդիպման ժամանակ։
PURL նախաձեռնությունը մեկնարկեց այն բանից հետո, երբ Թրամփի վարչակազմը հրաժարվեց Ուկրաինային անվճար զենք տրամադրել: Այժմ ամերիկյան զենքը Կիևին հասանելի է միայն այն դեպքում, երբ դաշնակից երկիրը համաձայնվի վճարել դրա համար:
Թարգմանությունը՝ Էմմա Չոբանյանի
