ՌԴ-ն զանգվածային հարված է հասցրել Ուկրաինայի քաղաքներին. վիրավորների թվում նորածին երեխա կա

Ռուսական զորքերը փետրվարի լույս 12-ի գիշերը զանգվածային հարված են հասցրել Ուկրաինային։ Current time-ի հաղորդմամբ՝ Կիևի քաղաքապետ Վիտալի Կլիչկոն գիշերը հայտնել է, որ ռուսական ուժերը բալիստիկ հրթիռներով հարվածում են քաղաքի ենթակառուցվածքներին: Ավելի ուշ նա նշել է, որ Դարնիցկիի շրջանում հարված է հասցվել մասնավոր տանը, իսկ Գոլոսիևսկի և Դեսնյանսկի շրջաններում՝ ոչ բնակելի շենքերին: Դնեպրոպետրովսկի շրջանում բեկորներ են ընկել բնակելի շենքի մոտ: Հաղորդվում է երկու վիրավորի մասին, որոնցից մեկը ծանր վիճակում է։

Դնեպրոպետրովսկի մարզային ռազմական վարչակազմի ղեկավար Ալեքսանդր Գանժան հայտնել է, որ Ռուսաստանը զանգվածային հրթիռային և անօդաչու թռչող սարքերի հարված է հասցրել Դնեպրին և Դնեպրոպետրովսկի շրջանին: Դնեպրում վիրավորվել է չորս մարդ, այդ թվում՝ նորածին երեխա: Բժիշկները նրա վիճակը գնահատում են միջին ծանրության:

Դնեպրում վնասվել են ենթակառուցվածքներ, մասնավոր տներ և մեքենաներ, իսկ Սինելնիկովկայի շրջանում՝ ենթակառուցվածքներ և մանկապարտեզ:

Օդեսայի տարածաշրջանային ռազմական վարչակազմի ղեկավար Օլեգ Կիպերը հայտնել է, որ Օդեսայի շրջանում վնասվել են քաղաքացիական և էներգետիկ ենթակառուցվածքները։ Հրդեհներ են բռնկվել շուկայում և սուպերմարկետում։ Մոտակա շենքերում կոտրվել են ապակիներ, 15 ​​մեքենա է այրվել։ Նախնական տվյալներով՝ մեկ մարդ վիրավորվել է։

Ռուսական բանակը գիշերը Ուկրաինայի վրա հարձակվել է 24 հրթիռներով և 219 ԱԹՍ-ով։ Դրանցից խոցվել է 16 հրթիռ և 197 անօդաչու թռչող սարք։ Հիմնական հարվածները հասցվել են Կիևին, Խարկովին, Դնեպրին և Օդեսային, հայտնել են Ուկրաինայի ռազմաօդային ուժերը։

Թարգմանությունը՝ Էմմա Չոբանյանի