Քաղաքականություն
12.02.2026 | 13:43
ԱՄՆ նախագահ Դոնալդ Թրամփը մասնավոր հանդիպում է ունեցել Իսրայելի վարչապետ Բենիամին Նեթանյահուի հետ և ասել, որ պնդում է Իրանի հետ բանակցությունների շարունակման հարցում, քանի որ ԱՄՆ-ն առաջ է մղում Թեհրանի հետ միջուկային գործարքը, գրում է France 24-ը։
Նեթանյահուն գրեթե երեք ժամ է անցկացրել Սպիտակ տանը։ Ո՛չ նա, ո՛չ էլ Թրամփը լրագրողների հարցերին չեն պատասխանել։ Դրանից հետո Թրամփը սոցցանցում գրել է, որ «շատ լավ հանդիպում» է եղել, բայց որ «որոշակի բանի չեն հասել, բացի այն, որ պնդել է Իրանի հետ բանակցությունները շարունակելու հարցում՝ տեսնելու համար՝ արդյո՞ք համաձայնագիրը կարող է կնքվել»։
«Անցյալ անգամ Իրանը որոշեց, որ ավելի լավ է չկնքել գործարքը և օդային հարված ստացավ ԱՄՆ-ից։ Հուսով եմ՝ այս անգամ նրանք ավելի խելամիտ և պատասխանատու կլինեն»,- գրել է Թրամփը։
Նեթանյահուի գրասենյակի հայտարարության մեջ ասվում է, որ երկու առաջնորդները քննարկել են Իրանի հետ բանակցությունները, ինչպես նաև Գազայում և տարածաշրջանում տեղի ունեցող զարգացումները, և նրանք «համաձայնվել են շարունակել իրենց սերտ համակարգումն ու հարաբերությունները»։
Հանդիպումը Թրամփի երկրորդ ժամկետի ընթացքում նրանց յոթերորդն էր և տեղի ունեցավ այն ժամանակ, երբ ԱՄՆ-ն և Իրանը զգուշավոր լավատեսություն են հայտնում ուրբաթ օրը Օմանում անուղղակի բանակցություններ անցկացնելուց հետո՝ այն մասին, թե ինչպես կրկին մոտենալ Իրանի միջուկային ծրագրի շուրջ բանակցություններին։
Հանդիպումից առաջ Նեթանյահուի գրասենյակը հայտարարել էր, թե Իսրայելը ցանկանում է, որ ԱՄՆ-Իրան բանակցությունները ներառեն Թեհրանի բալիստիկ հրթիռների ծրագիրն ու նրա աջակցության սահմանափակումները այնպիսի զինյալ խմբավորումների հետ կապվաած, ինչպիսին են ՀԱՄԱՍ-ը և Հըզբոլլահը։
«Ես նախագահին կներկայացնեմ մեր տեսակետը այս բանակցությունների սկզբունքների վերաբերյալ, այն էական սկզբունքների, որոնք, իմ կարծիքով, կարևոր են ոչ միայն Իսրայելի, այլև աշխարհում բոլոր նրանց համար, ովքեր ցանկանում են խաղաղություն և անվտանգություն Մերձավոր Արևելքում»,- ԱՄՆ մեկնելուց առաջ ասել էր Նեթանյահուն։
Ըստ հրապարակման՝ առայժմ պարզ չէ, թե որքան ազդեցություն կունենա Նեթանյահուն Թրամփի վրա Իրանի նկատմամբ մոտեցման հարցում։ Սկզբում Թրամփը սպառնում էր ռազմական գործողություններ ձեռնարկել Իրանի դեմ հունվարին համազգային բողոքի ցույցերի արյունալի ճնշման պատճառով, սակայն վերջին շաբաթներին անցել է ճնշման արշավի՝ փորձելով համոզել Թեհրանին համաձայնության գալ իր միջուկային ծրագրի շուրջ։
Նեթանյահուն հանդիպել է նաև պետքարտուղար Մարկո Ռուբիոյի հետ և համաձայնել լինել Գազայի Խաղաղության խորհրդի անդամ։
Ինչ վերաբերում է բանակցությունների վերաբերյալ Իրանի դիրքորոշմանը, երկրի ԱԳ նախարար Աբբաս Արաղչին ասել է, որ խորհրդակցություններ կլինեն «հաջորդ քայլերի» վերաբերյալ։ Նա նաև նշել է, որ երկու վաղեմի հակառակորդների միջև անվստահության մակարդակը մնում է «լուրջ մարտահրավեր բանակցությունների առջև»։ Նա ազդարարել է, որ Իրանը կպահպանի իր դիրքորոշումը, որ պետք է կարողանա հարստացնել ուրանը՝ Թրամփի հետ վիճաբանության հիմնական կետը։
Անցյալ տարվա նոյեմբերին Արաղչին հայտարարել էր, որ Իրանը այլևս չի հարստացնում ուրան՝ անցյալ տարվա պատերազմի պատճառած վնասի պատճառով։
Թարգմանությունը՝ Էմմա Չոբանյանի
