Քաղաքականություն
12.02.2026 | 13:26
Ադրբեջանի պետական AzTV հեռուստաալիքը խմբագրել է ԱՄՆ փոխնախագահ Ջեյ Դի Վենսի կատակն Ադրբեջանի առաջին տիկին և փոխնախագահ Մեհրիբան Ալիևայի մասին։ Մեկնաբանությունները հնչել են Վենսի և նախագահ Իլհամ Ալիևի միջև Բաքվում կարճատև մամուլի ասուլիսի ժամանակ, գրում է OC media-ն։
Ադրբեջանի և ԱՄՆ-ի միջև ռազմավարական գործընկերության խարտիայի ստորագրմանը հաջորդած մամուլի ասուլիսում Վենսն իր խոսքն ավարտել էր կատակով. «Երկրորդ տիկինը [Ուշա Վենսը] և ես շատ ուրախ ենք ընթրիքի համար։ Եվ, ինչպես ես հասկանում եմ, Ադրբեջանի փոխնախագահը նաև նախագահի կինն է։ Հուսով եմ՝ դա երկրորդ տիկնոջը որևէ գաղափար չի տալիս»։
Սպիտակ տան պաշտոնական հեռարձակման համաձայն՝ Ալիևը ծիծաղել և «այո» է պատասխանել Վենսին, բայց զրույցը Ադրբեջանում ցուցադրվել է այլ կերպ։ Նախապես AzTV-ն Վենսի մեկնաբանություններն անգլերենից թարգմանել է հետևյալ կերպ. «Ես գիտեմ, որ առաջին փոխնախագահը նախագահի կինն է, և մենք ուրախ ենք, որ մեր ամուսինների՝ կողակիցների միջև այս հարաբերությունները շարունակվում են»։
Ավելի ուշ նրա մեկնաբանությունների իրական ձևակերպումները տարածվել են անկախ լրատվամիջոցների կողմից, ինչպիսիք են Meydan TV-ն, Hamam Times-ը և Qazetchi-ն: Դրանից հետո AzTV-ն ավելացրել է Վենսի կատակի ճիշտ թարգմանությունը:
Ալիևան Ադրբեջանի փոխնախագահի պաշտոնում նշանակվել է ամուսնու հրամանագրով՝ 2017 թվականին։
Թարգմանությունը՝ Էմմա Չոբանյանի
