Ինչպես է վերահսկվելու օտարերկրյա հեռուստածրագրերի բովանդակությունը Հայաստանում․ նոր նախագիծ․ ՏԵՍԱՆՅՈՒԹ

«Հայաստանի Հանրապետության տեղեկատվական անվտանգությունը պատշաճ ապահովելու, դեպի քաղաքացիները բացասական տեղեկատվությունը նվազեցնելու, ինչպես նաև տեսալսողական մեդիաոլորտում առկա իրավական կարգավորումները կամ բացերը լրացնելու և հավասար մրցակցային պայմաններ ապահովելու նպատակով մենք ձեզ, սիրելի պատգամավորներ, առաջարկում ենք նոր կարգավորումներ սահմանել «Տեսալսողական մեդիայի մասին» օրենքում»,- այս մասին ԱԺ-ում հայտարարեց ԲՏԱ նախարար Մխիթար Հայրապետյանը։

26 հեռուստաալիքներ կան, որոնք ամբողջ հանրապետությունով 100 տոկոսանոց սփռում ունեն և անվճար են քաղաքացիների համար։ Հայրապետյանի խոսքով՝ «Տեսալսողական մեդիայի մասին» օրենսդրությունը, որը ընդունվել է 2020 թվականի հուլիսին, կարգավորում է միայն հանրային մուլտիպլեքսի տիրույթը:

«Օրեցօր ավելի ու ավելի շատ մյուս մակարդակներում են մեր քաղաքացիները սկսում օգտվել, տարատեսակ մեդիա կոնտենտ ստանալ, ինչը նշանակում է, որ օրեցօր այս օրենքը ավելի ու ավելի քիչ թվով շահառուների համար է կարգավորումներ նախատեսում, այսինքն՝ ավելի մեծ հատվածը մնում է բաց օրենքի կարգավորումների տեսանկյունից: Եվ ահա, մենք առաջարկում ենք, որ այն կարգավորումները, որոնք գործում են հանրային մուլտիպլեքսի, այսինքն՝ հիշեցնեմ՝ այն 26 հեռուստաալիքների համար՝ հանրապետական, մայրաքաղաքային և մարզային, դրանք պետք է տարածվեն հետայսու նաև ցանցային օպերատորների համար, այսինքն՝ կաբելային հեռուստաալիքների պարագայում ևս այդ կարգավորումները պետք է տարածվեն»,-նշեց նախարարը:

Մանրամասները՝ տեսանյութում։