06.03.2026 | 18:20
Իրանը հայտարարել է, որ «որոշ երկրներ միջնորդական ջանքեր են սկսել»
Սպասում ենք ԱՄՆ-ի կողմից փոխադարձ դիրքորոշման. Կոբախիձեն՝ վրաց-ամերիկյան հարաբերությունների մասին
Քաղաքականություն
10.02.2026 | 20:27
Վրաստանի վարչապետ Իրակլի Կոբախիձեն մեկնաբանել է ԱՄՆ վարչակազմի ներկայացուցիչների դիրքորոշումը, որն արտահայտել են Վրաստանի վեցերորդ նախագահ Միխեիլ Ղավելաշվիլին և արտաքին գործերի նախարար Մակա Բոճորիշվիլին՝ Իտալիա կատարած այցից հետո։ Վրաստանի վարչապետը նշել է, որ Թբիլիսին բազմիցս արտահայտել է իր դիրքորոշումը Վաշինգտոնի վերաբերյալ։ Վրաստանը պատրաստ է վերականգնել իր ռազմավարական գործընկերությունը ԱՄՆ-ի հետ։
«Սա շատ հստակ դիրքորոշում է, և մենք սպասում ենք փոխադարձ քայլերի»,- հավելել է նա։
Կոբախիձեն ընդգծել է, որ երկրի իշխանությունները կսպասեն ԱՄՆ նախագահ Դոնալդ Թրամփի վարչակազմի արձագանքին այնքան ժամանակ, որքան անհրաժեշտ է՝ նշելով, որ Միացյալ Նահանգների հետ հարաբերությունների վերականգնումը կախված է ամերիկյան կողմից։
«Մենք սպասում ենք Միացյալ Նահանգների կողմից փոխադարձ դիրքորոշման։ Մենք կսպասենք այնքան ժամանակ, որքան անհրաժեշտ է։ Մենք հույս ունենք, որ Միացյալ Նահանգների և Վրաստանի միջև ռազմավարական գործընկերությունը կվերականգնվի։ Մենք կարևոր քայլ ենք կատարել՝ բացահայտորեն արտահայտել ենք մեր դիրքորոշումը ռազմավարական գործընկերության վերսկսման վերաբերյալ։ Մենք հայտարարել ենք, որ պատրաստ ենք քննարկել բոլոր մանրամասները առանց որևէ պայմանի, և քննարկել դրանք երկու կողմերի շահերն արտացոլող կոնկրետ ուղեցույցով։ Մենք պատրաստ ենք վերսկսել ռազմավարական գործընկերությունը զրոյից։ Սա է մեր դիրքորոշումը»,- հայտարարել է Կոբախիձեն։
Նրա խոսքով՝ ամերիկյան կողմից վերջերս ստացված հաղորդագրությունները խրախուսելի են։ Նա հավելել է, որ Թբիլիսին «լիարժեք բաց է հարաբերությունների վերագործարկման և ռազմավարական գործընկերության վերականգնման հարցում»։
«Ամերիկյան կողմից ստացված վերջին հաղորդագրությունները մեզ լավատեսություն են ներշնչում։ Մենք կսպասենք և կտեսնենք, թե ինչպես կզարգանան իրադարձությունները։ Մեր ցանկությունն է՝ վերականգնել մեր ռազմավարական գործընկերությունը։ Մենք կսպասենք ամերիկյան քայլերին այս ուղղությամբ»,- ասել է Իրակլի Կոբախիձեն։
Փետրվարի 8-ին «Իմեդի» հեռուստաընկերության եթերում Վրաստանի վեցերորդ նախագահ Միխեիլ Ղավելաշվիլին խոսել էր ԱՄՆ փոխնախագահ Ջեյ Դի Վենսի հետ հանդիպման և կարճատև գործնական զրույցի մասին, որի ընթացքում ամերիկացի քաղաքական գործիչը հայտարարել է, որ լավ տեղեկացված է Վրաստանի մասին և կվերսկսի հարաբերությունները:
Թարգմանությունը՝ Էմմա Չոբանյանի
