ԱՄՆ սենատորները Վենսին կոչ են անում Բաքվում բարձրացնել բանտարկված լրագրողների ազատության հարցը

ԱՄՆ երկու դեմոկրատ սենատորներ դիմել են երկրի փոխնախագահ Ջեյ Դի Վենսին՝ կոչ անելով Բաքվում հանդիպումների ընթացքում բարձրացնել Ադրբեջանում բանտարկված լրագրողների ազատ արձակման հարցը։ Սենատի արտաքին հարաբերությունների հանձնաժողովի անդամ Ջին Շահինը X-ում գրառման մեջ խնդրել է Վենսին՝ պահանջել ազատ արձակել Բաքվում «անարդարացիորեն ձերբակալված» մի քանի անձանց՝ տնտեսագետ պրոֆեսոր Գուբադ Իբադօղլուին, «Ազատություն» ռադիոկայանի լրագրող Ֆարիդ Մեհրալիզադեին, «Ամերիկայի ձայն»-ի նախկին թղթակից Ուլվիյա Ալիին և մեդիա փորձագետ Ալասկեր Մամեդլիին։ Սենատորի խոսքով՝ «նրանց ազատ արձակումը պետք է լինի տարածաշրջանում ԱՄՆ ջանքերի առաջնահերթությունը»։

Մեկ այլ դեմոկրատ սենատոր Քրիս Վան Հոլենը, որը Սենատի բյուջեի և արտաքին հարաբերությունների հանձնաժողովների անդամ է, փոխնախագահին ուղղված նամակում ուշադրություն է հրավիրել ԱՄՆ-ի հետ կապված լրատվամիջոցների երկու լրագրողների՝ Ուլվիյա Ալիի և Ֆարիդ Մեհրալիզադեի «անարդար բանտարկության» ուղղությամբ և կոչ արել նրանց անհապաղ ազատ արձակել: Սենատորը գրում է, որ այս երկու լրագրողները «ոչ մի վատ բան չեն արել» և միայն պատժվել են ԱՄՆ-ի կողմից աջակցվող լրատվամիջոցներում աշխատելու համար։

Նամակում նաև նշվում է, որ Ուլվիյա Ալիին ծեծի են ենթարկել կալանքի ընթացքում, նրա առողջական վիճակը վատթարացել է, Ֆարիդ Մեհրալիզադեն չի կարողացել կնոջ կողքին լինել, երբ նրա երեխան ծնվել է, իսկ նրա կինը՝ Նարգիզ Մուխտարովան, այժմ մեկ այլ քրեական գործով է անցնում։

Freedom House միջազգային իրավապաշտպան կազմակերպությունը նույնպես X-ում դիմել է Ջեյ Դի Վենսին՝ կոչ անելով նրան Բաքու այցի ընթացքում «Ալիևի ռեժիմի» հետ հանդիպումներում բարձրացնել քաղբանտարկյալների հարցը։

Ավելի վաղ ԱՄՆ կոնգրեսական Ջեյմս Մաքգովերնը նույնպես կոչ էր արել փոխնախագահին աշխատել խղճի բանտարկյալների ազատ արձակման ուղղությամբ Բաքու կատարած այցի ընթացքում պաշտոնյաների հետ հանդիպումների ժամանակ։

Թարգմանությունը՝ Էմմա Չոբանյանի