05.06.2026 | 00:02
Փաշինյանին և Թաթոյանին զրկեցին խոսքի իրավունքից. ՏԵՍԱՆՅՈՒԹ
Միրոսլավ Կլոզեն պատմել է՝ ինչու է «Նյուրնբերգը» ձեռք բերել Ստյոպա Մկրտչյանին
10.02.2026 | 16:16
«Նյուրնբերգի» գլխավոր մարզիչ Միրոսլավ Կլոզեն անդրադարձել է Հայաստանի ազգային հավաքականի պաշտպան Ստյոպա Մկրտչյանի նորամուտին գերմանական ակումբում։ 22-ամյա ֆուտբոլիստը «Նյուրնբերգում» նորամուտը նշել էր «Պադերբորնի» դեմ 2-րդ Բունդեսլիգայի 21-րդ տուրի խաղում (1։2)։ Մկրտչյանը խաղն սկսել էր մեկնարկային կազմում և առաջին խաղակեսում սեփական տուգանային հրապարակում խախտել էր կանոնները, ինչից հետո նշանակվել է 11-մետրանոց հարված ու «Պադերբորնը» բացել էր հաշիվը։
«Նա ընդամենը 2 օր է մարզվել թիմի հետ։ Դեռ ամեն բան իդեալական չէ, բայց նա փորձառու է։ Նա արդեն բարձր մակարդակում խաղացել է հավաքականի կազմում, այդ պատճառով մենք ընտրեցինք հենց նրան»,- Գերմանիայի հավաքականի ու Մյունխենի «Բավարիայի» նախկին հարձակվող Միրոսլավ Կլոզեի խոսքը մեջբերում է Kicker-ը։
Ստյոպա Մկրտչյանն օրեր առաջ խորվաթական «Օսիեկից» է տեղափոխվել «Նյուրնբերգ», որը, ըստ Transfermarkt-ի, 800 հազար եվրո է վճարել գործարքի համար։ Հայաստանի հավաքականում պաշտպանը նորամուտը նշել է 2022 թվականին ու մինչև օրս անցկացրել է 23 խաղ։ Transfermarkt-ը 400 հազար եվրո է գնահատում նրա տրանսֆերային արժեքը։
