ԱՄՆ-ը և Ադրբեջանը քննարկել են TRIPP-ով էլեկտրաէներգիայի փոխադրման նախագիծը

ԱՄՆ Առևտրի պալատի գործարար առաքելության Ադրբեջան այցի շրջանակում տեղի ունեցած քննարկմանը, որին մասնակցել են այդ երկրի էներգետիկայի նախարար Փարվիզ Շահբազովը, ինչպես նաև SOCAR-ի, Azerenergy-ի, Azerishig-ի, Azeristiliktedjizat-ի, Վերականգնվող էներգիայի պետական ​​գործակալության և Էներգետիկայի կարգավորման գործակալության ներկայացուցիչներ, անդրադարձ է եղել Ադրբեջանի, Թուրքիայի, Կենտրոնական Ասիայի ու Եվրոպայի միջև էլեկտրաէներգետիկ միջանցքներին, ներառյալ՝ էլեկտրաէներգիայի փոխադրմանը TRIPP-ով, այդ նախագծերի շրջանակում ամերիկյան ընկերությունների հետ համագործակցության հեռանկարներին։

Կողմերը փոխադարձ հետաքրքրություն են հայտնել Ադրբեջանի և Միացյալ Նահանգների միջև համագործակցությունը զարգացնելու հարցում տեխնոլոգիաների, գիտելիքների, փորձի և էներգետիկայի ոլորտում ներդրումների ոլորտներում։

Ընդգծվել է, որ երկու երկրների ղեկավարների քաղաքականությունը, որն ուղղված է տարածաշրջանային խաղաղության ապահովմանը և ռազմավարական գործընկերության վրա հիմնված ադրբեջանա-ամերիկյան հարաբերությունների ամրապնդմանը, նույնպես խթանել է էներգետիկ համագործակցության զարգացումը:

Քննարկվել է նավթի, գազի, վերականգնվող էներգիայի, էլեկտրաէներգիայի, ջրածնի և էներգաարդյունավետության ոլորտներում համագործակցության ներուժը: Դիտարկվել է նաև SOCAR-ի և ExxonMobil-ի միջև համագործակցության վիճակը:

Հաղորդվում է, որ Ադրբեջան մեկնած ամերիկյան պատվիրակության կազմում են Apple, Ardea Energy Technologies Inc., Ericsson AB, ExxonMobil, Herbalife, Illumina, Meta, Visa, Wabtec, Baker Hughes, bp, Boeing Global, Honeywell, J.P. Morgan, Lummus Technology, Marriott, Mastercard, Shell International, Motorola Solutions, Fuji Engineering, Global Data Risk, Hill International, Straife և այլ ընկերությունների ղեկավար անձինք։

Թարգմանությունը՝ Էմմա Չոբանյանի