02.04.2026 | 22:24
Երևանի և 9 մարզի մի շարք հասցեներում էլեկտրաէներգիայի անջատումներ կլինեն
ՌԴ-ի և Ուկրաինայի միջև պատերազմը դադարեցնելու բանակցությունները շարունակվում են, բայց առջևում «երկար ճանապարհ» կա․ Լավրով
Քաղաքականություն
10.02.2026 | 16:38
ՌԴ արտաքին գործերի նախարար Սերգեյ Լավրովը հայտարարել է, որ ռուս-ուկրաինական պատերազմը դադարեցնելու բանակցությունները շարունակվում են, բայց դեռ «երկար ճանապարհ կա անցնելու»։ НТВ-ին տված հարցազրույցում նա կոչ է արել խուսափել «իրադարձությունների ոգևորված ընկալումից, որ ԱՄՆ նախագահ Դոնալդ Թրամփը եվրոպացիներին, Վլադիմիր Զելենսկիին իրենց տեղն է դրել», գրում է Meduza-ն։
«Սա լավ է, եթե մենք ուզում ենք խաղաղության հասնել Ուկրաինայում, բայց մենք դեռ այնտեղ չենք։ Բանակցությունները շարունակվում են. երկրորդ փուլը տեղի է ունեցել Աբու Դաբիում, դեռ երկար ճանապարհ կա անցնելու»,- ասել է Լավրովը:
Ռուսաստանը, Ուկրաինան և Միացյալ Նահանգները Աբու Դաբիում անցկացրել են բանակցությունների երկու փուլ։ Առաջինը տեղի է ունեցել հունվարի 23-24-ին, երկրորդը՝ փետրվարի 4-5-ին։ Կողմերը համաձայնության եկել 157 գերիների փոխանակման հարցով՝ 157-ը 157-ի դիմաց։ Ուկրաինայի նախագահի գրասենյակի ղեկավար Կիրիլ Բուդանովը հայտարարել է, որ բանակցությունները «կառուցողական» են եղել։
Բանակցությունների կոնկրետ բովանդակության մասին քիչ բան է հայտնի։ ՏԱՍՍ-ը, հղում անելով «Աբու Դաբիի արևմտյան աղբյուրին», հաղորդել է, թե Մոսկվան, որպես «մեծ գործարքի» մաս, ցանկանում է, որ միջազգային հանրությունը պաշտոնապես ճանաչի Ռուսաստանի ինքնիշխանությունը Դոնբասի նկատմամբ։
Ուկրաինայի նախագահ Վլադիմիր Զելենսկիի խոսքով՝ Միացյալ Նահանգներն առաջարկում է պատերազմը դադարեցնել մինչև ամռան սկիզբ, քանի որ հետագայում այն կունենա մեկ այլ առաջնահերթություն՝ Կոնգրեսի ընտրությունները։
Աբու Դաբիում նախնական բանակցություններից հետո ԱՄՆ պետքարտուղար Մարկո Ռուբիոն հայտարարել էր, որ խաղաղության ծրագրի մշակման միակ չլուծված հարցը տարածքային խնդիրն է։ Զելենսկին նշում է, որ տարածքային հարցը կարող է լուծվել միայն Վլադիմիր Պուտինի հետ անձնական հանդիպման միջոցով։
Թարգմանությունը՝ Էմմա Չոբանյանի
