13.05.2026 | 19:20
Թրամփը հայտարարել է՝ Իրանի միջուկային ծրագրի դադարեցումն ավելի կարևոր է ամերիկացիների ֆինանսական դժվարություններին
SpaceX-ը մտադիր է քաղաք կառուցել Լուսնի վրա
Հաղորդաշարեր
09.02.2026 | 15:02
Ամերիկացի միլիարդատեր գործարար Իլոն Մասկի SpaceX-ը վերանայել է իր անելիքների ցանկը։ Կիրակի X-ում գրառման մեջ ընկերության գործադիր տնօրենը նշել է, որ այն Մարսից իր ուշադրությունը տեղափոխում է Լուսնի վրա «ինքնաբավ քաղաքի» ստեղծման ուղղությամբ, գրում է Business Insider-ը։
«Մարս ճանապարհորդել հնարավոր է միայն այն դեպքում, երբ մոլորակների ընթացքը համընկնում է յուրաքանչյուր 26 ամիսը մեկ (վեցամսյա թռիչքի տևողություն), մինչդեռ մենք կարող ենք Լուսին թռչել յուրաքանչյուր 10 օրը մեկ (երկօրյա թռիչքի տևողություն)։ Սա նշանակում է, որ մենք կարող ենք լուսնային քաղաք կառուցել շատ ավելի արագ, քան մարսյան քաղաքը»,- գրել է Մասկը։
Հայտարարությունը մեծապես տարբերվում է Մասկի նախորդ մեկնաբանություններից այս տարի կարմիր մոլորակ հասնելու վերաբերյալ։ 2020 թվականին SpaceX-ի գործադիր տնօրենը հայտարարել էր, թե վստահ է, որ ընկերությունը մարդկանց կուղարկի Մարս մինչև 2026 թվականը։
«Եթե բախտներս բերի, գուցե չորս տարի»,- ասել էր Մասկը 2020 թվականին։
Տիեզերական ընկերությունը պատմականորեն հետաձգել է հավակնոտ նախագծերը՝ դրանց բարդության և կարգավորող մարտահրավերների պատճառով։ Կիրակի օրվա գրառման մեջ Մասկը հավելել է, որ SpaceX-ը կշարունակի Մարսի վրա քաղաքի կառուցման ծրագիրը՝ այն սկսելով 5-7 տարի հետո։
«Սակայն գերակա խնդիրը քաղաքակրթության ապագայի ապահովումն է, և Լուսինն ավելի արագ է»,- գրել է նա։
Անցյալ շաբաթ Մասկը հայտարարել էր, որ SpaceX-ը ձեռք կբերի xAI-ը, որը Grok չաթբոտը ստեղծող իր ընկերությունն է։ X սոցիալական մեդիա հարթակը xAI-ը ձեռք է բերել 2025 թվականի մարտին։
Գլխավոր տնօրենը գրել է, որ SpaceX-ի կողմից xAI-ի ձեռքբերումը կստեղծի «Երկրի (և դրանից դուրս) ամենահավակնոտ, ուղղահայաց ինտեգրված նորարարական կենտրոնը, որը կներառի արհեստական բանականություն, հրթիռներ, տիեզերական ինտերնետ, բջջային սարքերի հետ ուղիղ կապ և աշխարհի առաջատար հարթակ՝ իրական ժամանակում տեղեկատվության փոխանակման և խոսքի ազատության համար»։
Թարգմանությունը՝ Էմմա Չոբանյանի
